കോട്ടയം: കൈക്കൂലി വാങ്ങുന്നതിനിടയില്‍ ഗ്രേഡ് എസ്‌ഐ പിടിയില്‍. ഗാന്ധിനഗര്‍ പോലീസ് സ്റ്റേഷനിലെ ഗ്രേഡ് എസ്‌ഐ വി.എച്ച്. നസീറിനെയാണ് വിജിലന്‍സ് ആന്‍ഡ് ആന്‍റി കറപ്ഷന്‍ ബ്യൂറോ ഇന്ന് രാത്രിയില്‍ പിടികൂടിയത്.
2000 രൂപയും ഫുള്‍ ബോട്ടില്‍ മദ്യവുമാണ് ഇയാള്‍ പരാതിക്കാരനില്‍ നിന്നും കൈക്കൂലിയായി വാങ്ങിയത്. കോട്ടയം മെഡിക്കല്‍ കോളജ് ഭാഗത്തുള്ള കേരള ടൂറിസ്റ്റ് ഹോമില്‍ വച്ചാണ് ഇയാള്‍ കൈക്കൂലി വാങ്ങിയത്.
ഇവിടെ മുറിയെടുത്തശേഷം പരാതിക്കാരനില്‍ നിന്നും പണവും മദ്യക്കുപ്പിയും ഇയാള്‍ കൈക്കൂലിയായി വാങ്ങുകയായിരുന്നു.
പരാതിക്കാരന്‍ വിവരമറിയിച്ചത് അനുസരിച്ച് സ്ഥലത്ത് എത്തിയ വിജിലന്‍സ് സംഘം ഇയാളെ പിടികൂടുകയായിരുന്നു. കസ്റ്റഡിയിലെടുത്ത വാഹനം വിട്ടുനൽകുന്നതിനാണ് നസീർ കൈക്കൂലി ആവശ്യപ്പെട്ടത്.
