മോഹന്‍ലാല്‍ നായകനായി 2015ല്‍ പുറത്തിറങ്ങിയ ചിത്രമായിരുന്നു ലൈല ഓ ലൈല. ആക്ഷന്‍ ത്രില്ലര്‍ ഗണത്തില്‍ പെട്ട ഈ ചിത്രം സംവിധാനം ചെയ്തത് ഹിറ്റ് മേക്കര്‍ ജോഷി ആയിരുന്നു.
അമലപോള്‍ ആയിരുന്നു ചിത്രത്തിലെ നായിക. എന്നാല്‍ ചിത്രം ബോക്‌സോഫീസില്‍ പരാജയമായി.
ഫൈന്‍കട്ട് എന്റര്‍ടൈന്‍മെന്റ്സ്, ആശിര്‍വാദ് സിനിമാസ് എന്നിവര്‍ ചേര്‍ന്നാണ് ചിത്രം നിര്‍മ്മിച്ചിരുന്നത്.
ഗോപി സുന്ദര്‍ സംഗീതസംവിധാനം നിര്‍വഹിച്ചിരിക്കുന്ന ഈ ചിത്രം മാക്സ് ലാബ് എന്റര്‍ടൈന്‍മെന്റ്സ് ആണ് പ്രദര്‍ശനത്തിന് എത്തിച്ചത്.
മോഹന്‍ലാലിനും അമലപോളിനും പുറമെ സത്യരാജ്, രമ്യാ നമ്പീശന്‍ തുടങ്ങിയവരും ചിത്രത്തില്‍ അഭിനയിച്ചിരിക്കുന്നു.
ചിത്രത്തില്‍ ഒരു സുപ്രധാന കഥാപാത്രത്തെ അവതരിപ്പിച്ചത് ബോളിവുഡ് നടി കൈനത്ത് അറോറ എന്ന ബോളിവുഡ് നടിയായിരുന്നു.
ഗ്രാന്റ് മസ്തി എന്ന ബ്ലോക്ക് ബസ്റ്റര്‍ ചിത്രത്തിലൂടെ ബോളിവുഡില്‍ അരങ്ങേറി ശ്രദ്ധ നേടിയ കൈനത്തിന്റെ ലൈല ഓ ലൈലയിലെ പ്രകടനം ശ്രദ്ധിക്കപ്പെടുകയും താരത്തിന് നിരവധി ആരാധകര്‍ ഉണ്ടാവുകയും ചെയ്തിരുന്നു.
മങ്കാത്ത, കട്ട മീത്ത തുടങ്ങിയ സിനിമകളിലും കൈനത്ത് അറോറ അഭിനയിച്ചിരുന്നു. ഉത്തര്‍പ്രദേശിലെ പഞ്ചാബി കുടുംബത്തിലാണ് കൈനത്ത് അറോറ ജനിച്ചത്.
തമിഴിനും മലയാളത്തിനും പുറമെ തെലുങ്ക് സിനിമകളിലും കൈനത്ത് അറോറ അഭിനയിച്ചിട്ടുണ്ട്.
അകാലത്തില്‍ പൊലിഞ്ഞ ബോളിവുഡ് മുന്‍കാല നായിക ദിവ്യാ ഭാരതിയുടെ ബന്ധു കൂടിയാണ് കൈനത്ത് അറോറ.
കുറച്ച് നാളുകളായി കൈനത്ത് അറോറയെ ബോളിവുഡില്‍ കാണാനില്ലായിരുന്നു. കാരണം തിരക്കിയപ്പോള്‍ പ്രാദേശികമായ ചില പരിപാടികള്‍ ഉണ്ടായിരുന്നുവെന്നും അതിന്റെ തിരക്കിലായിരുന്നുവെന്നും കൈനത്ത് അറോറ പറയുന്നു.
രാജു ഛദ്ദ, ദീപക് തിജോരി എന്നിവര്‍ക്കൊപ്പം മുംബൈയിലെ മാഡ് ഐലന്‍ഡില്‍ പുതിയ സിനിമയുടെ ചിത്രീകരണ തിരക്കിലാണ് കൈനത്ത് അറോറ ഇപ്പോള്‍.
ടിപ്സി എന്നാണ് ചിത്രത്തിന്റെ പേര്. സാഹസീകതയും ത്രില്ലറുമെല്ലാം സമം ചേര്‍ന്ന സിനിമയാണ് ടിപ്സിയെന്നും കൈനത്ത് പറയുന്നു.
തന്റെ വിവാഹ നിശ്ചയം കഴിഞ്ഞതായും കൈനത്ത് ഇടൈസിന് നല്‍കിയ അഭിമുഖത്തില്‍ പറഞ്ഞു.
പാഴ്‌സി വിഭാഗത്തില്‍പ്പെടുന്ന നവീലുമായിട്ടാണ് തന്റെ വിവാഹനിശ്ചയം കഴിഞ്ഞതെന്നും ഇപ്പോള്‍ തങ്ങള്‍ ഒരുമിച്ച് താമസിക്കുകയാണെന്നും കൈനത്ത് പറയുന്നു.
അടുത്തിടെ കൈനത്തിന്റെ രഹസ്യ വിവാഹം കഴിഞ്ഞെന്നും ശേഷം ഒത്തുപോകാന്‍ സാധിക്കാത്തതിനാല്‍ ഇരുവരും പിരിഞ്ഞെന്നും വാര്‍ത്തകളുണ്ടായിരുന്നു.
അത് നിരസിച്ചുകൊണ്ട് കൈനത്ത് പറഞ്ഞു ‘ഞങ്ങള്‍ ഒരുമിച്ചാണ് താമസിക്കുന്നത്. വിവാഹനിശ്ചയം കഴിഞ്ഞു. ഇത് മനോഹരമായ ആരോഗ്യകരമായ ബന്ധമാണ്’ എന്ന്.
അര്‍ജുന്‍ രാംപാലിനെ നായകനാക്കി രാജു ഛദ്ദ വീണ്ടും നിര്‍മ്മിക്കുന്ന ഒരു സിനിമക്കായി താന്‍ കരാര്‍ ഒപ്പിട്ടിട്ടുണ്ടെന്നും ഷിറാസ് ഭട്ടാചാര്യയാണ് സംവിധാനം ചെയ്യുന്നതെന്നും സെപ്തംബറില്‍ ലണ്ടനില്‍ സുരാഗ് എന്ന് പേരിട്ടിരിക്കുന്ന സിനിമയുടെ ഷൂട്ടിംങ് ആരംഭിക്കുമെന്നും കൈനത്ത് അറോറ വെളിപ്പെടുത്തി.
ജയപ്രദയും ഹിറ്റെന്‍ തേജ്വാനിയും അഭിനയിക്കുന്ന ഫാത്തിമ എന്ന വെബ് സീരിസിലും താന്‍ അഭിനയിക്കുമെന്ന് കൈനത്ത് പറഞ്ഞു. സഞ്ജീവ് റായിയാണ് ഫാത്തിമ സംവിധാനം ചെയ്യുന്നത്.
