നവാഗതരായ അനൂപ് അറക്കൽ-നിതിൻ കൃഷ്ണൻ എന്നിവർ ചേർന്ന് തിരക്കഥയെഴുതി സംവിധാനം ചെയ്യുന്ന ചിത്രം കാലാളിന്‍റെ പ്രമോഷൻ വീഡിയോ യുവ നടൻ ആന്‍റണി വർഗീസ് (പെപ്പെ) പുറത്തിറക്കി. സത്യസന്ധമായ ജനസേവനം ലക്ഷ്യമിട്ട് രാഷ്ട്രീയ പാർട്ടിയിൽ പങ്കെടുത്ത് പ്രവർത്തിക്കുന്ന അഞ്ച് യുവാക്കൾ നേരിടേണ്ടിവരുന്ന സംഘർഷങ്ങളുടെ കഥയാണ് കാലാൾ പറയുന്നത്.
പ്രശ്നങ്ങളിൽനിന്നു രക്ഷപ്പെടാൻ കഥാപാത്രങ്ങൾ നടത്തുന്ന തന്ത്രപരവും രസകരവുമായ ശ്രമങ്ങൾ സസ്പെൻസിൽ പൊതിഞ്ഞ് ചിത്രത്തിൽ അവതരിപ്പിച്ചിരിക്കുന്നു. സാജിർ ആണ് ചിത്രത്തിന്‍റെ നിർമാണം നിർവഹിച്ചിരിക്കുന്നത്.
സാദഫ്, സ്നേഹ എന്നിവർ പ്രധാന വേഷത്തിലെത്തുന്ന കാലാളിന്‍റെ പ്രമോഷൻ വീഡിയോ അമിഗോ എന്‍റർടെയിൻമെന്‍റിന്‍റെ യു ട്യൂബ് ചാനൽ വഴിയാണ് പുറത്തിറങ്ങിയത്. കാമറ-നിഖിൽ വിജയൻ, എഡിറ്റിംഗ്-മോജി ടി. വർഗീസ്, ഗാനരചന-ഏങ്ങാണ്ടിയൂർ ചന്ദ്രശേഖരൻ, ക്രീയേറ്റീവ് ഡയറക്ടർ-രഞ്ജിത്ത് രഘുനാഥ്. രാജേഷ് അപ്പുക്കുട്ടനും പ്രവീണ്‍ പ്രേംനാഥും ചേർന്നാണ് സംഗീതം നിർവഹിച്ചിരിക്കുന്നത്.
