തളിപ്പറമ്പ്: ശാദുലിയുടെ സത്യസന്ധതയ്ക്ക് പത്തരമാറ്റ്. ദേശീയപാതയോരത്ത് നിന്നും വീണുകിട്ടിയ 64,000 രൂപയാണ് ചുമട്ടുതൊഴിലാളിയുടെ സത്യസന്ധത കാരണം ഉടമയ്ക്ക് തിരിച്ചുകിട്ടിയത്. ഇന്നലെ ഉച്ചയ്ക്കാണ് ഏഴോം ഓണപ്പറമ്പിലെ എന്‍.ഷംസുദ്ദീന്‍റെ 64,000 രൂപയടങ്ങിയ പൊതി ദേശീയപാതയ്ക്കരികില്‍ നഷ്ടപ്പെട്ടത്.
പ്ലാസ ഹോട്ടലിന് സമീപത്തുനിന്നുമാണ് ഹൈവേയിലെ ചുമട്ടുതൊഴിലാളിയും എസ്ടിയു പ്രവര്‍ത്തകനുമായ എം.പി.ശാദുലിക്ക് പണമടങ്ങിയ പൊതി ലഭിച്ചത്. പരിസരത്ത് അന്വേഷിച്ചുവെങ്കിലും പണം നഷ്ടപ്പെട്ടയാളെ കണ്ടെത്താനായില്ല. ഉടന്‍ തന്നെ ശാദുലി പണം തളിപ്പറമ്പ് പോലീസ് സ്റ്റേഷനിലേല്‍പ്പിച്ചു.
ഈ സമയം തന്നെ പണം നഷ്ടപ്പെട്ട ഷംസുദ്ദീനും പരാതിയുമായി സ്റ്റേഷനിലെത്തി.സ്റ്റേഷനിൽവച്ച് തന്നെ പോലീസിന്‍റെ സാന്നിധ്യത്തില്‍ ശാദുലി പണം ഷംസുദ്ദീന് കൈമാറി.
