കർണാടക നിയമസഭാ തിരഞ്ഞെടുപ്പിൽ തങ്ങൾക്കുവേണ്ടി പ്രചാരണത്തിനിറങ്ങണമെന്ന് അഭ്യർഥിച്ച് നടനും മക്കൾ നീതി മയ്യം നേതാവുമായ കമൽഹാസനെ കോൺഗ്രസ് സമീപിച്ചതായി സൂചന.
തെരഞ്ഞെടുപ്പിന് ദിവസങ്ങൾ മാത്രം അവശേഷിക്കെയാണ് കോൺഗ്രസ് താരത്തെ സമീപിച്ചത്. അതേ സമയം കോൺഗ്രസിന്‍റെ അഭ്യർത്ഥന കമൽഹാസൻ പരിഗണിക്കുന്നുണ്ടെന്നാണ് മക്കൾ നീതി മയ്യം കേന്ദ്രങ്ങളിൽ നിന്ന് ലഭിക്കുന്ന വിവരം.
കർണാടകയിൽ മേയ് 10 ന് വോട്ടെടുപ്പ് നടക്കുന്ന 224 സീറ്റുകളിലേക്ക് 2,613 സ്ഥാനാർത്ഥികളാണ് മത്സരരംഗത്തുള്ളത്. മെയ് 13 ന് ഫലം പ്രഖ്യാപിക്കും.
2,613 സ്ഥാനാർത്ഥികളിൽ 2,427 പുരുഷൻമാരും 184 സ്ത്രീകളും മറ്റ് 2 പേരും ഉണ്ടെന്ന് കർണാടക ചീഫ് ഇലക്ടറൽ ഓഫീസറുടെ ഓഫീസ് അറിയിച്ചു. 918 പേർ സ്വതന്ത്രര സ്ഥാനാർത്ഥികളും മത്സര രംഗത്തുണ്ട്.
തമിഴ്‌നാട്ടിലെ ഈറോഡ് (ഈസ്റ്റ്) ഉപതെരഞ്ഞെടുപ്പിൽ കോൺഗ്രസ് സ്ഥാനാർത്ഥി ഇ.വി.കെ.എസ് ഇളങ്കോവനെ കമൽഹാസൻ പിന്തുണച്ചിരുന്നു.
