ചെന്നൈ: ഡൽഹി നിയമസഭാ തെരഞ്ഞെടുപ്പിൽ വിജയക്കൊടി പാറിച്ച് ഭരണത്തുടർച്ച നേടിയ ആംആദ്മി പാർട്ടിയേയും മുഖ്യമന്ത്രി അരവിന്ദ് കേജരിവാളിനെയും അഭിനന്ദിച്ച് നടനും മക്കൾ നീതി മയ്യം തലവനുമായ കമൽ ഹാസൻ.
ഡൽഹിയിലെ ജനങ്ങൾ പുരോഗമന രാഷ്ട്രീയത്തെ ഉൾക്കൊണ്ടിരിക്കുന്നു എന്നതിന് തെളിവാണ് എഎപിയുടെ വിജയമെന്ന് കമൽ ട്വീറ്റ് ചെയ്തു.
അടുത്ത വർഷം തമിഴ്നാട് ഇത് പിന്തുടരുമെന്നും നമുക്ക് സത്യസന്ധതയിലേക്കും വളർച്ചയിലേക്കും പോകാമെന്നും അദ്ദേഹം ട്വീറ്റിൽ ചേർത്തിട്ടുണ്ട്. അതോടൊപ്പം, രജനീകാന്തുമായുള്ള സഖ്യത്തേക്കുറിച്ച് ആലോചിക്കുമെന്നു അദ്ദേഹം മാധ്യമങ്ങളോട് വ്യക്തമാക്കി.
രജനി പാർട്ടി രൂപീകരിച്ചതിനു ശേഷം സഖ്യത്തേക്കുറിച്ച് കൂടുതൽ പറയാമെന്നും കമൽ പറഞ്ഞു. എന്നാൽ, ബിജെപിയുമായി സഹകരിക്കാനാകില്ലെന്ന നിലപാട് തുടരുമെന്ന് പറഞ്ഞ അദ്ദേഹം മഴവിൽ സഖ്യസാധ്യത പാടെ തള്ളുകയും ചെയ്തു.
