കുറവിലങ്ങാട്: കാണക്കാരി ടൗണിൽ പ്രവർത്തിക്കുന്ന ഗ്രാമീണ്‍ ബാങ്ക്, സിൻഡിക്കേറ്റ് ബാങ്ക് എന്നിവയുടെ എടിഎമ്മുകളുടെ ചില്ല് എറിഞ്ഞുടച്ചു. എടിഎം മെഷീനുകളുടെ ചില്ല് എറിഞ്ഞുടയ്ക്കുന്ന ദൃശ്യങ്ങൾ സമീപത്തെ കാമറയിൽ വ്യക്തമായി പതിഞ്ഞിട്ടുണ്ട്. ഇന്നു പുലർച്ചെ രണ്ടോടെയാണ് ചില്ല് എറിഞ്ഞുടയ്ക്കുന്നത്. ഒരു സ്ത്രീയാണ് കല്ലെടുത്ത് എറിഞ്ഞിട്ടുള്ളതെന്ന് കാമറ ദൃശ്യങ്ങൾ വ്യക്തമാക്കുന്നുണ്ട്.
എടിഎമ്മിന്‍റെ മുൻഭാഗത്തെ ചില്ലുകളാണ് എറിഞ്ഞുടച്ചത്. സമൂഹിക വിരുദ്ധ പ്രവർത്തനം നടത്തിയ സ്ത്രീക്ക് മാനസിക പ്രശ്നങ്ങളുള്ളതായി പോലീസ് പറയുന്നു. കുറവിലങ്ങാട് എസ്ഐ ടി.ആർ ദീപുവിന്‍റെ നേതൃത്വത്തിലുള്ള പോലീസ് സംഘം സംഭവത്തിൽ വിശദമായ അന്വേഷണം നടത്തുന്നുണ്ട്.
