കൊച്ചി: വടുതല സ്വദേശിയായ പത്താം ക്ലാസ് വിദ്യാര്‍ഥിക്ക് മദ്യവും കഞ്ചാവും സ്ഥിരമായി നല്‍കിവന്നിരുന്ന മൂന്നു യുവാക്കളെ പോലീസ് പിടികൂടി. വടുതല സ്വദേശികളായ ഏയ്ഞ്ചല്‍ കോട്ടേജില്‍ അലന്‍ ഫ്രാങ്ക്ളിന്‍ (22), കൊല്ലംവേലിയാത്ത് ഡെറിന്‍ പീറ്റര്‍(18), കുറുവന്തറ അതുല്‍ അജു(19) എന്നിവരാണ് എറണാകുളം നോര്‍ത്ത് പോലീസിന്‍റെ പിടിയിലായത്.
സംഭവത്തെക്കുറിച്ച് പോലീസ് പറയുന്നത്: പഠനത്തില്‍ മികവ് കാട്ടിയിരുന്ന വിദ്യാർഥി അടുത്തയിടെ പിന്നോക്കം പോയതും ഇടയ്ക്കിടെ രാത്രി വൈകി വീട്ടില്‍ എത്തുന്നതും പതിവായ തോടെ വീട്ടുകാര്‍ക്ക് സംശയം തുടങ്ങി. അടുത്ത കൂട്ടുകാരുടെ ബര്‍ത്ത്‌ഡേപോലുള്ള പരിപാടികളും മറ്റുമാണു വൈകിവരുന്നതിനു കാരണമായി കുട്ടി വീട്ടുകാരെ വിശ്വസിപ്പിച്ചിരുന്നത്. എന്നാല്‍ പല ദിവസങ്ങളിലും കുട്ടി മദ്യപിച്ചാണ് വീട്ടിലെത്തുന്നതെന്ന് മനസിലായി.
കഴിഞ്ഞ ദിവസം രാത്രി 11 ആയിട്ടും കുട്ടി വീട്ടില്‍ എത്താതിരുന്നതിനെത്തുടര്‍ന്ന് ഫോണില്‍ വിളിച്ചപ്പോള്‍ കൂട്ടുകാരന്‍റെ ബര്‍ത്ത് ഡേ ആണെന്ന് പറഞ്ഞു ഫോണ്‍വച്ചു. എന്നാല്‍ ഫോണ്‍ കട്ട് ആയിട്ടുണ്ടായിരുന്നില്ല. ഫോണിലൂടെ കുറേപ്പേരുടെ ശബ്ദം കേട്ട അമ്മ ഫോണ്‍ അച്ഛനു കൊടുക്കുകയും അതിലൂടെ കൂട്ടുകാര്‍ ചേര്‍ന്ന് മയക്കുമരുന്ന് ഉപയോഗിക്കുകയാണെന്ന് മനസിലാക്കുകയും ചെയ്തു. എന്നാല്‍ ഇവര്‍ കൂട്ടുകൂടുന്ന സ്ഥലം കണ്ടെത്താന്‍ കഴിഞ്ഞില്ല. പുലര്‍ച്ചെ വീട്ടില്‍ തിരിച്ചെത്തിയ കുട്ടിയെ ഒന്നും അറിയാത്തപോലെ മുറിയില്‍ കയറ്റി കിടത്തുകയും ചെയ്തു.
ഒരു മണിക്കൂറിനു ശേഷം കുട്ടിയെ മുറിയില്‍ കാണാത്തതിനെ തുടര്‍ന്ന് നോക്കിയപ്പോള്‍ വീടിന്‍റെ മുകളിലെ വാട്ടര്‍ ടാങ്കിന്‍റെ പുറത്ത് ചുരുണ്ടുകൂടി കിടക്കുകയായിരുന്നു. തുടര്‍ന്ന് മാതാപിതാക്കള്‍ ചോദ്യം ചെയ്തപ്പോഴാണ് പ്രതികൾ മൂന്നു പേരും ചേര്‍ന്ന് ചെറിയ കുട്ടികള്‍ക്കു മദ്യവും മയക്കു മരുന്നും നല്‍കിവരുന്ന കാര്യം മനസിലായത്. കുട്ടിയെ കൗണ്‍സിലിംഗിനു കൊണ്ടുപോയ ശേഷം അച്ഛൻ നോര്‍ത്ത് സ്റ്റേഷനിലെത്തി പരാതി നല്‍കി. തുടര്‍ന്ന് പോലീസ് നടത്തിയ അന്വഷണത്തിലാണ് ഇവര്‍ പിടിയിലായത്.
എറണാകുളം നോര്‍ത്ത് പോലീസ് സ്റ്റേഷന്‍ സിഐ സിബി ടോം, എസ്‌ഐമാരായ അനസ്, ഡെന്നി, എഎസ്‌ഐ വിനോദ് കൃഷ്ണ, പോലീസുകാരായ അജിലേഷ്, ഓസ്റ്റിന്‍ എന്നിവര്‍ ചേര്‍ന്നാണ് പ്രതികളെ അറസ്റ്റുചെയ്തത്. കൂടുതല്‍ പേര്‍ ഇതില്‍ ഉള്‍പ്പെട്ടിട്ടുണ്ടോ എന്ന കാര്യം പോലീസ് പരിശോധിച്ചു വരികയാണ്.
കോടതിയില്‍ ഹാജരാക്കിയ മൂന്നു പേരെയും ജുവനൈല്‍ ജസ്റ്റീസ് ആക്ട് പ്രകാരം റിമാന്‍ഡ് ചെയ്തു. വടുതല പച്ചാളം ഭാഗത്തു തുടര്‍ന്നുള്ള ദിവസങ്ങളില്‍ പരിശോധന ശക്തമാക്കുമെന്ന് പോലീസ് അറിയിച്ചു.
