കൊച്ചി: ക്രിസ്മസ് പുതുവത്സര ആഘോഷങ്ങള്‍ ലക്ഷ്യമിട്ട് വില്പനയ്‌ക്കെത്തിച്ച മയക്കുമരുന്നുമായി പിടിയിലായ അഞ്ച് യുവാക്കളെ റിമാന്‍ഡ് ചെയ്തു.
കണ്ണൂര്‍ ശ്രീകണ്ഠപുരം സ്വദേശികളായ മുഹമ്മദ് ഫഹീം (25), ഷബീര്‍ (39), കണ്ണൂര്‍ തളിപ്പറമ്പ് സ്വദേശി നിവാസ് (31), കോട്ടയം വടവത്തൂര്‍ സ്വദേശി അലന്‍ (24), കണ്ണൂര്‍ ചെറുകുന്ന് സ്വദേശി ഇര്‍ഷാദ് (22) എന്നിവരെയാണ് തൃക്കാക്കരയിലെ ഹോട്ടലില്‍നിന്ന് ഡാന്‍സാഫും തൃക്കാക്കര പോലീസും ചേര്‍ന്നു പിടികൂടിയത്.
മാസങ്ങളായി പ്രതികളെ നിരീക്ഷിച്ച് വരികയായിരുന്നു. നിരവധി കേസുകളിലെ പ്രതികളാണിവര്‍. ഹോട്ടലുകളില്‍ മുറിയെടുത്ത് മയക്കുമരുന്ന് ഇടപാട് നടത്തിവരികയായിരുന്നു.
പ്രതികളില്‍ നിന്ന് 24.78 ഗ്രാം എംഡിഎംഎ, 4.67 ഗ്രാം എക്സ്റ്റസി പില്‍, 7.99 ഗ്രാം കഞ്ചാവ് എന്നിവ പിടിച്ചെടുത്തു. കൊച്ചി സിറ്റി നര്‍ക്കോട്ടിക്‌സ് അസി. കമ്മിഷണരുടെ നിര്‍ദേശപ്രകാരം ഡാന്‍സാഫ് സബ് ഇന്‍സ്‌പെക്ടറുടെ നേതൃത്വത്തില്‍ നടത്തിയ റെയ്ഡിലാണ് മയക്കുമരുന്ന് വില്പന സംഘത്തെ പിടികൂടിയത്.
വരും ദിവസങ്ങളിലും റെയ്ഡ് തുടരുമെന്ന് ഡാന്‍സ് സാഫ് സംഘം അറിയിച്ചു. ക്രിസ്മസ് പുതുവത്സരാഘോഷങ്ങളുടെ ഭാഗമായി നടക്കുന്ന ഡിജെ പാര്‍ട്ടികളെല്ലാം പോലീസ് നിരീക്ഷണത്തിലായിരിക്കുമെന്ന് അന്വേഷണ സംഘം അറിയിച്ചു.
