കാഞ്ഞിരപ്പള്ളി: കഴിഞ്ഞ ദിവസം ഫയർസ്റ്റേഷനു സമീപം ശബരിമല തീർഥാടകരുടെ വാഹനം അപകടത്തിൽപ്പെട്ട വളവിൽ മോട്ടോർവാഹനവകുപ്പ് പരിശോധന നടത്തി. അപകട വളവിൽ സുരക്ഷാ മുൻകരുതലിന്‍റെ ഭാഗമായി അടിയന്തര റിപ്പോർട്ട് സമർപ്പിക്കാൻ മോട്ടോർ വാഹനവകുപ്പ് ഉദ്യോഗസ്ഥരാണ് പരിശോധനകൾ നടത്തിയത്. സ്ഥിരം അപകട മേഖലയായി മാറിയ പ്രദേശത്ത് റോഡിലെ വളവുകളിലെ വീതി കുറവാണ് കഴിഞ്ഞ ദിവസത്തെ അപകടത്തിന് കാരണമെന്ന് വകുപ്പ് കണ്ടെത്തി. 665 മീറ്റർ വീതിയുള്ള റോഡിൽ മുണ്ടക്കയത്തു നിന്നും കാഞ്ഞിരപ്പള്ളിക്കുള്ള വശത്തിന് 360 മീറ്ററും കാഞ്ഞിരപ്പള്ളിയിൽ നിന്നും മുണ്ടക്കയത്തിനുള്ള വശത്തിനു 365 മീറ്ററുമാണ് വീതി.
വളവുകളിൽ സാധാരണ വീതികൂട്ടി നിർമാണം നടത്തേണ്ടത് ഇവിടെ നടന്നിട്ടില്ലെന്നും പ്രദേശത്ത് റോഡിന് 220 സെന്‍റീമീറ്റർ ഇരുവശങ്ങളിലും വർധിപ്പിച്ച് 815 സെന്‍റീമീറ്റർ വീതി കൂട്ടണമെന്നും ഒപ്പം വളവിനു സമീപം ഇലക്ട്രിക് പോസ്റ്റ് 50 മീറ്റർ ഉള്ളിലേക്കു മാറ്റി സ്ഥാപിക്കണമെന്നും പരിശോധക സംഘം പറയുന്നു. കൂടാതെ അപകട പ്രദേശത്തെ വളവിൽ ഏറ്റവും അടിയന്തരമായി ഹാച്ച് ലൈൻ രേഖപ്പെടുത്തി 25 മീറ്റർ ദൂരത്തിൽ കോണുകൾ സ്ഥാപിക്കണമെന്നും ഉദ്യോഗസ്ഥ സംഘം വിലയിരുത്തി.
സമീപത്തേ കടകളിലെ സാധനങ്ങൾ റോഡിലെ വശങ്ങളിലേക്ക് ഇറക്കി വെച്ചിരിക്കുന്നത് മാറ്റാൻ നടപടി വേണമെന്നും റിപ്പോർട്ടിലുണ്ട്. വീതി കുറവുള്ള റോഡിൽ വാഹനങ്ങൾ മറുവശത്തേക്ക് ഇരുഭാഗത്തുനിന്നും കേറി വരുന്നതാണ് അപകടത്തിന് കാരണമെന്നും ഉദ്യോഗസ്ഥർ ചൂണ്ടികാട്ടി. വളവിൽ അടിയന്തരമായി ചെയ്യേണ്ട പ്രവർത്തനങ്ങളെക്കുറിച്ചും ഉദ്യോഗസ്ഥർ കണ്ടെത്തിയ റിപ്പോർട്ടും കളക്ടർക്ക് റിപ്പോർട്ട് നൽകും.
റോഡ് സേഫ്റ്റി ഉദ്യോഗസ്ഥർ ഈ ആഴ്ച നടക്കുന്ന മീറ്റിംഗിൽ ഇത് സംബന്ധിച്ച് തീരുമാനമെടുക്കും. ഞായറാഴ്ചയാണ് ശബരിമല തീർഥാടകർ സഞ്ചരിച്ച ബസും മിനി ബസും കൂട്ടിയിടിച്ച് 22 പേർക്ക് പരിക്കേറ്റത്. ആർടിഒ ടോജോ എം. തോമസിന്റെ നിർദേശപ്രകാരം കോട്ടയം സ്ക്വാഡിലെ എംവിഐമാരായ തോമസ് സക്കറിയ, യു. സുനിൽകുമാർ, എഎംവിഐമാരായ എച്ച്. രജീഷ്, എം.ആർ. അനിൽ എന്നിവർ പരിശോധനയ്ക്ക് നേതൃത്വം നൽകി.
