കൊണ്ടോട്ടി: പ്രതിസന്ധികളും പ്രതിഷേധങ്ങൾക്കുമൊടുവിൽ കരിപ്പൂർ വിമാനത്താവളത്തിൽ നിന്നു നാളെ സൗദി എയർലെൻസിന്‍റെ വലിയ വിമാനം സർവീസ് ആരംഭിക്കും. മലബാറിന്‍റെ വികസ സ്വപ്നങ്ങൾക്കു വ്യോമയാന പാതയൊരുക്കുന്ന വലിയ വിമാനത്തെ ജനപ്രതിനിധികളും പ്രവാസികളും രാഷ്ട്രീയ, സാംസ്കാരിക സംഘടനകളും നാട്ടുകാരും ചേർന്നു സ്വീകരിക്കും.
ജിദ്ദയിൽ നിന്നു പുലർച്ചെ മൂന്നിനു പുറപ്പെടുന്ന സൗദിയുടെ എസ്.വി 746 വിമാനം രാവിലെ 11.10 നാണ് കരിപ്പൂരിൽ വന്നിറങ്ങുക. ആദ്യസംഘത്തിൽ സൗദി എയർ ജനറൽ മാനേജർ, സൗദി കൗണ്‍സിൽ ജനറൽ എന്നിവരുമെത്തും. 298 പേർക്കു സഞ്ചരിക്കാൻ കഴിയുന്ന വിമാനത്തിൽ ഇന്നലെ വരെ 258 പേർ യാത്രക്കാരായുണ്ട്. ഇന്നത്തോടെ വിമാന സീറ്റുകൾ പൂർണമാകും.
ബിസിനസ് ക്ലാസ് യാത്രക്കാർക്കു 32 കിലോയുടെ രണ്ടു ബാഗേജും ഒന്പതു കിലോയുടെ ഹാൻഡ് ബാഗും എക്കണോമിക്് യാത്രക്കാർക്കു 23 കിലോയുടെ രണ്ടു ബാഗുകളും ആറു കിലോ ഹാൻഡ് ബാഗേജും അനുവദിച്ചിട്ടുണ്ട്.17 ടണ്‍ കാർഗോയാണ് വിമാനത്തിൽ അനുവദിക്കുക. എന്നാൽ യാത്രക്കാർ കുറവുള്ള സമയത്ത് 20 കിലോവരെ കൊണ്ടുപോകും.
ആദ്യവിമാനത്തെ എയർപോർട്ട് അഥോറിറ്റി വാട്ടർ സല്യൂട്ട് നൽകി സ്വീകരിക്കും. വിമാനത്തിലെ കന്നിയാത്രക്കാർക്കു പൂക്കളും പ്രത്യേക ഉപഹാരവും നൽകിയാണ് സ്വീകരിക്കുക. കരിപ്പൂരിലെത്തുന്ന വിമാനം പിന്നീട് എസ്.വി 747 ആയി ഉച്ചക്ക് 1.10ന് ജിദ്ദക്ക് പറക്കും. ആദ്യസംഘത്തിൽ ഇന്നലെ വരെ 276 പേർ യാത്രക്കാരായുണ്ട്.
അവസാന വിമിഷം സീറ്റുകൾ പൂർണമാകും. ആഴ്ചയിൽ ഏഴു ദിവസമാണ് കരിപ്പൂരിൽ നിന്നു ആദ്യഘട്ടത്തിൽ സൗദി എയർലെൻസിന്‍റെ സർവീസുണ്ടാവുക. ഇതിൽ തിങ്കൾ, ബുധൻ, വ്യാഴം, ശനി ദിവസങ്ങളിൽ ജിദ്ദയിലേക്കും ചൊവ്വ, വെളളി, ഞായർ ദിവസങ്ങളിൽ റിയാദിലേക്കുമായിരിക്കും സർവീസ്. ജനുവരിയിൽ സർവീസ് വർധിപ്പിക്കാനാണ് തീരുമാനം.
കരിപ്പൂരിൽ റണ്‍വേ റീകാർപ്പറ്റിങ്ങിന്‍റെ പേരിൽ 2015 മാർച്ച് 30മുതലാണ് വലിയ വിമാനങ്ങൾക്കു നിയന്ത്രണം ഏർപ്പെടുത്തിയത്. പിന്നീട് റീകാർപ്പറ്റിങ്ങ് ജോലികൾ കഴിഞ്ഞെങ്കിലും റണ്‍വേ നീളം വർധിപ്പിക്കാതെ വലിയ വിമാനങ്ങൾക്കു അനുമതി നൽകാനാകില്ലെന്നു വ്യോമയാന മന്ത്രാലയം അറിയിച്ചതോടെയാണ് കരിപ്പൂരിന്‍റെ ചിറകൊടിഞ്ഞത്. പിന്നീട് രാഷ്ട്രീയ, സാംസ്കാരിക, മത, സാമൂഹിക സംഘടനകളുടെ ചെറുത്തുനിൽപ്പ് സമരത്തിനൊടുവിലാണ് വലിയ വിമാനങ്ങൾക്കു അനുമതി നൽകിയത്.
