സിംഗപുർ: അമേരിക്കയുടെ വെറ്ററൻ താരം വീനസ് വില്യംസിനെ പരാജയപ്പെടുത്തി ഡെൻമാർക്ക് താരം കരോളിനെ വോസ്നിയാക്കി ഡബ്ല്യുടിഎ ഫൈനൽസിൽ കിരീടം ചൂടി. ഡബ്ല്യുടിഎ ഫൈനൽസിന്‍റെ ഫൈനലിൽ പ്രവേശിക്കുന്ന ഏറ്റവും പ്രായം കൂടിയ താരമെന്ന റിക്കാർഡുമായെത്തിയ വീനസിന് നേരിട്ടുള്ള സെറ്റുകൾക്കാണ് പരാജയം നേരിട്ടത്. സ്കോർ: 6-4 6-4.
ആദ്യ സെറ്റ് കടുത്ത പോരാട്ടത്തിലൂടെയാണ് വോസ്നിയാക്കി സ്വന്തമാക്കിയത്. എന്നാൽ രണ്ടാം സെറ്റിൽ വീനസിനെ നിഷ്പ്രഭയാക്കി വോസ്നിയാക്കി 5-0 ന്‍റെ ലീഡ് സ്വന്തമാക്കി. പിന്നിൽനിന്ന് പൊരുതിക്കയറിയ വീനസ് തുടർച്ചയായി നാല് ഗെയിം സ്വന്തമാക്കി വെല്ലുവിളിയുയർത്തി. എന്നാൽ അമേരിക്കൻ താരത്തെ സെറ്റ് സ്വന്തമാക്കാൻ അനുവദിക്കാതെ വോസ്നിയാക്കി ജയിച്ചുകയറി.
