മുഹമ്മ: പച്ചക്കറി കൃഷിയിൽ മികവു കൊയ്ത് ജില്ലയിലെ മികച്ച സ്കൂളിനുള്ള അവാർഡ് കരസ്ഥമാക്കിയ മുഹമ്മ സിഎംഎസ് എൽപി സ്കൂൾ ജില്ലാ പോലീസ് മേധാവി കെ.എം. ടോമി സന്ദർശിച്ചു. കാർഷിക മേഖലയിൽ മികച്ച പ്രവർത്തനത്തിന് ഒന്നാം സ്ഥാനം നേടിയ അധ്യാപിക എൻ.എം. ഷേർളി, മികച്ച കുട്ടി കർഷക റോസ് സെബാസ്റ്റ്യൻ എന്നിവരെയും സ്കൂൾ അധികൃതരേയും അധ്യാപക രക്ഷാകർതൃസമിതിയേയും അദ്ദേഹം അഭിനന്ദിച്ചു.
മാധ്യമ വാർത്തകൾ ശ്രദ്ധയിൽപ്പെട്ട അദ്ദേഹം ഇന്നലെ രാവിലെയാണ് സ്കൂളിലെ കൃഷിത്തോട്ടം സന്ദർശിച്ചത്. വിജിലൻസിൽ ജോലി ചെയ്യുന്പോൾ മികച്ച പച്ചക്കറി കർഷകനായിരുന്ന ജില്ലാ പോലീസ് മേധാവി അവാർഡു ലഭിച്ച കുട്ടി കർഷക റോസ് സെബാസ്റ്റ്യനെ പച്ചക്കറി തോട്ടത്തിൽ വച്ച് എടുത്തുയർത്തിയാണ് അഭിനന്ദിച്ചത്. പച്ചക്കറി ബൊക്കയും പൂക്കളും നൽകിയാണ് ജില്ലാ പൊലീസ് മേധാവിയെ പ്രധാനാധ്യാപിക ജോളി തോമസും പിടിഎ പ്രസിഡന്‍റ് കെ.പി. സുധീറും അധ്യാപകരും വിദ്യാർഥികളും ചേർന്ന് സ്വീകരിച്ചത്.
