കാലടി: ശ്രീശങ്കര കോളജില്‍ ഹോളി ആഘോഷത്തിനിടെയുണ്ടായ സംഘര്‍ഷത്തില്‍ രണ്ടു പേര്‍ക്ക് കുത്തേറ്റ സംഭവത്തിൽ ഒരാൾ കസ്റ്റഡിയിലെന്ന് സൂചന.സംഭവുമായി ബന്ധപ്പെട്ട് അഞ്ച് പേര്‍ക്കെതിരേ കേസ് എടുത്തതായി കാലടി പോലീസ് അറിയിച്ചു.
കോളജിലെ വിദ്യാര്‍ഥി കോടനാട് പാലാട്ടി ആദിത്യന്‍ (20), പൂര്‍വവിദ്യാര്‍ഥി പെരുമ്പാവൂര്‍ മുണ്ടക്കല്‍ അമൽ ശിവന്‍ (24) എന്നിവര്‍ക്കാണ് കുത്തേറ്റത്. ഇവരെ അങ്കമാലിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
വയറ്റില്‍ ആഴത്തിൽ മുറിവേറ്റ അമലിന്‍റെ നില ഗുരുതരമാണ്. ഇയാളെ തീവ്രപരിചരണ വിഭാഗത്തിലേക്കു മാറ്റി.
ഹോളി ആഘോഷങ്ങളുടെ ഭാഗമായി ഇന്നലെ ഉച്ചകഴിഞ്ഞ് രണ്ടരയോടെ കോളജില്‍ സംഘടിപ്പിച്ച ഡിജെ ആഘോഷത്തിനിടെയായിരുന്നു സംഘർഷം.
കോളജിലെ എസ് ബ്ലോക്കിനു സമീപം പ്രത്യേകം തായാറാക്കിയ സ്റ്റേജിലായിരുന്നു പരിപാടി. പരിപാടി കാണാൻ പുറത്തുനിന്നുള്ളവരുമെത്തിയതോടെ കാമ്പസ് നിറഞ്ഞു.
കോവിഡ് മാനദണ്ഡങ്ങള്‍ പാലിക്കാതെ സംഘടിപ്പിച്ച പരിപാടിക്കു പോലീസിന്‍റെയോ ബന്ധപ്പെട്ട ഉദ്യോഗസ്ഥരുടെയോ അനുവാദം ലഭിച്ചിരുന്നില്ലെന്നാണ് അറിയുന്നത്.
ലഹരി വസ്തുക്കള്‍ ഉപയോഗിച്ചശേഷം വിദ്യാര്‍ഥികള്‍ ഉള്‍പ്പടെയുള്ളവര്‍ പരിപാടിയിൽ പങ്കെടുത്തതായി വിദ്യാര്‍ഥികളിൽ ഒരു വിഭാഗം പറയുന്നു.
