കൊച്ചി: കടം വാങ്ങിയ പണം തിരികെ ചോദിച്ചതിന്‍റെ പേരിലുണ്ടായ വാക്കുതര്‍ക്കത്തെ തുടര്‍ന്ന് യുവാവിനെ കുത്തിപ്പരിക്കേല്‍പ്പിച്ച കേസില്‍ പ്രതി കത്തി വാങ്ങിയത് ഓൺലൈനിൽ.
ഒരാഴ്ച മുന്പാണ് കേസിലെ ഒന്നാം പ്രതിയായ കോന്തുരുത്തി സ്വദേശി നവീന്‍ (20) പ്രമുഖ ഒൺലൈൻ ഷോപ്പിംഗ് സൈറ്റിലൂടെ കത്തി വാങ്ങുന്നത്. കോന്തുരുത്തി ജ്യേതാനഗര്‍ റോഡില്‍ കസീബ കോളനിയില്‍ വാടകയ്ക്ക് താമസിക്കുന്ന വിശാല്‍ (19) എന്നയാളെയാണ് കുത്തി പരിക്കേൽപ്പിച്ചത്.
കേസിൽ കസ്തൂബാനഗറില്‍ താമസിക്കുന്ന മെജോ (23), മോസസ് (19) എന്നിവരെയും പോലീസ് എറണാകുളം സൗത്ത് പോലീസ് അറസ്റ്റ് ചെയ്തിരുന്നു. കേസിലെ നാലാം പ്രതി ഒളിവിലാണ്. ഇയാള്‍ക്കായി അന്വേഷണം ഊര്‍ജിതമാക്കിയിട്ടുണ്ട്.
പിടിയിലായ പ്രതികള്‍ അടിപിടി, മയക്കുമരുന്ന്, നരഹത്യശ്രമ കേസിലും പ്രതികളാണ്. കത്തിയും പ്രതികള്‍ സഞ്ചരിച്ചിരുന്ന ഓട്ടോയും പോലീസ് കസ്റ്റഡിയിലെടുത്തിരുന്നു. കോടതിയിൽ ഹാജരാക്കിയ പ്രതികളെ റിമാന്‍ഡ് ചെയ്തു.
