വൈക്കം: കക്ക ഇറച്ചി വാങ്ങിയ ശേഷം പണം നൽകാത്തതിനെ ചൊല്ലിയുള്ള തർക്കത്തിനിടയിൽ കക്ക ഇറച്ചി വിൽപ്പനക്കാരനെ ഇറച്ചി വാങ്ങാനെത്തിയയാൾ കുത്തിപ്പരിക്കേൽപ്പിച്ചു. നെഞ്ചിലും ഇടതു കൈ വെള്ളയിലും കുത്തേറ്റ ടി വിപുരം ചെaമ്മനത്തുകര ഇടയാട്ടിൽ മുരളി (55)യെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
കുത്തിയ കേസിലെ പ്രതി ടിവിപുരം ഇടയാട്ടിൽ നടരാജൻ (62) വൈക്കം താലൂക്ക് ആശുപത്രിയിൽ പോലീസ് നിരീക്ഷണത്തിൽ ചികിൽസയിലാണ്. കഴിഞ്ഞ ശനിയാഴ്ച വൈകുന്നേരം 6.30ന് ടിവിപുരം ബോട്ട് ജെട്ടിക്കു സമീപമായിരുന്നു സംഭവം.
60 രൂപയ്ക്ക് കക്ക ഇറച്ചി വാങ്ങിയ നടരാജൻ, മുരളി പണം ചോദിച്ചിട്ടു നൽകാതെ കലഹിക്കുകയായിരുന്നു. വാക്കുതർക്കത്തിനിടയിൽ മദ്യലഹരിയിലായിരുന്ന നടരാജൻ കയ്യിൽ കരുതിയിരുന്ന കത്തികൊണ്ട് മുരളിയെ കുത്തുകയായിരുന്നെന്ന് പോലീസ് പറഞ്ഞു.സംഭവത്തിൽ വൈക്കം പോലീസ് നടരാജനെതിരെ കേസെടുത്തു.
