കത്രീന കൈഫിന്‍റെ ഇൻസ്റ്റാഗ്രാം അക്കൗണ്ട് ഹാക്ക് ചെയ്യപ്പെട്ടോയെന്ന സംശയം ആരാധകർക്ക് തോന്നിയാൽ തെറ്റു പറയാനൊക്കില്ല. ആരാണ് ഈ കാമീഡിയ മോഡറേറ്റ്സ് എന്ന് അവർ ചോദിക്കുന്നു.
ബോളിവുഡ് സുന്ദരി കത്രീന കൈഫിന്‍റെ ഇൻസ്റ്റാഗ്രാം ഹാൻഡിൽ കാമീഡിയ മോഡറേറ്റ്സ് എന്നാക്കി മാറ്റിയത് ആരാണെന്ന ചോദ്യം ബാക്കിയാണ്.
അധികനേരം ഈ പേര് അക്കൗണ്ടിൽ നിലനിന്നില്ല. പെട്ടെന്നു തന്നെ കത്രീനയുടെ യഥാർഥ പേര് ഹാൻഡിലിൽ ഇടം നേടുകയും ചെയ്തു.
താരത്തിന്‍റെ അക്കൗണ്ട് ഹാക്ക് ചെയ്യപ്പെട്ടോയെന്നാണ് സ്വഭാവികമായി ആദ്യം ഉയർന്ന സംശയം. കത്രീന കൈഫിന് ഇൻസ്റ്റാഗ്രാമിൽ 66 ദശലക്ഷത്തിലധികം ഫോളോവേഴ്‌സ് ഉണ്ട്.
താരത്തിന്‍റെ വരാനിരിക്കുന്ന ഹൊറർ കോമഡി ചിത്രമായ ഫോൺ ഭൂതിന്‍റെ പബ്ലിസിറ്റി സ്റ്റണ്ടാണ് ഇതെന്നാണ് ചിലർ സംശയിച്ചത്.
കത്രീനയുടെ അക്കൗണ്ട് ഹാക്ക് ചെയ്യപ്പെട്ടതായി സോഷ്യൽ മീഡിയയിലെ ഒരു വിഭാഗം വിശ്വസിക്കുകയും ചെയ്യുന്നു.
അതേസമയം, സാങ്കേതിക തകരാർ മൂലമാണ് ഈ ഹ്രസ്വമായ പേര് മാറ്റം ഇൻസ്റ്റാഗ്രാമിൽ സംഭവിച്ചതെന്നാണ് കത്രീനയുടെ ടീം വാദിക്കുന്നത്.
ഇഷാൻ ഖട്ടറും സിദ്ധാന്ത് ചതുർവേദിയും അഭിനയിക്കുന്ന ഗുർമീത് സിംഗിന്‍റെ ഫോൺ ഭൂത് എന്ന ചിത്രത്തിൽ കത്രീന കൈഫ് ഉടൻ പ്രത്യക്ഷപ്പെടും. ‘ഫോൺ ഭൂത്’ നവംബർ നാലിന് റിലീസ് ചെയ്യും.
ഇതുകൂടാതെ ആലിയ ഭട്ടും പ്രിയങ്ക ചോപ്രയും അഭിനയിക്കുന്ന ‘ജീ ലെ സരാ’യിലും കത്രീന കൈഫ് അഭിനയിക്കുന്നുണ്ട്.
