ഇരിട്ടി(കണ്ണൂർ): മുഴക്കുന്നില്‍ ജനവാസ കേന്ദ്രത്തില്‍ കാട്ടാനക്കൂട്ടമിറങ്ങി. ബൈക്ക് യാത്രക്കാരനെ കാട്ടാനക്കൂട്ടം അക്രമിച്ചു. വട്ടപൊയിലിലെ ഒതയോത്ത് വിനോദ് കുമാറി(48)നെയാണ് അക്രമിച്ചത്. കാലുകള്‍ തകര്‍ന്ന ഇദ്ദേഹത്തെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചു.
ഇന്നു പുലര്‍ച്ചെ അഞ്ചിന് എയര്‍പോര്‍ട്ടില്‍ പോയി മടങ്ങവെയാണ് വീടിന് സമീപം റോഡില്‍ വെച്ച് ആനക്കൂട്ടം ബൈക്ക് തകര്‍ത്ത് യാത്രക്കാരനെ അക്രമിച്ചത്. പുലര്‍ച്ചെ ആന ഓടിച്ചതിനെ തുടര്‍ന്ന് വട്ടപൊയിലിലെ ശങ്കരന്‍ നമ്പൂതിരിയുടെ കാല്‍ ഒടിഞ്ഞു.
വട്ടപൊയില്‍, കൂളിക്കുന്ന് മേഖലകളില്‍ കാട്ടാനക്കൂട്ടം വ്യാപക കൃഷി നാശവും വരുത്തിയിരുന്നു. മേഖലയിലെ വീടുകളുടെ മതിലും കാട്ടാനകള്‍ തകര്‍ത്തു. മൂന്നാനകൾ കൂളിക്കുന്നില്‍ നില്‍ക്കുകയാണ്. ജനവാസ കേന്ദ്രത്തില്‍ നിന്ന് ഇവയെ തുരത്താന്‍ വനപാലകരും പോലീസും ചേര്‍ന്ന് ശ്രമം തുടങ്ങി.
കഴിഞ്ഞ ഡിസംബറിലും ആനക്കൂട്ടം ഇവിടെ എത്തിയിരുന്നു. മുഴക്കുന്ന് പഞ്ചായത്തിലെ പാലപ്പുഴ , കല്ലേരിമല മേഖലകളില്‍ കഴിഞ്ഞ ദിവസങ്ങളിലെല്ലാം കാട്ടാനക്കൂട്ടമിറങ്ങി കൃഷി നശിപ്പിച്ചിരുന്നു.
