പത്തനാപുരം:പാടം പൂമരുതിക്കുഴിയില്‍ കാട്ടാനയുടെ ആക്രമണത്തില്‍ രണ്ട് പേര്‍ക്ക് പരിക്ക്.ഇന്നലെ രാത്രി പതിനൊന്നരയോടെയാണ് സംഭവം.വാര്‍ഡ് മെമ്പര്‍ സജീവ് റാവുത്തര്‍,പ്രദേശവാസി രാജേന്ദ്രന്‍ എന്നിവര്‍ക്കാണ് പരിക്കേറ്റത്.
ഗുരുതരമായി പരിക്കേറ്റ രാജേന്ദ്രന്‍ കോട്ടയം മെഡിക്കല്‍ കോളജാശുപത്രിയില്‍ ചികിത്സയിലാണ്.പൂമരുതിക്കുഴിയിലും പരിസരപ്രദേശങ്ങളിലും ഏറെ നാളായി കാട്ടാന ശല്യം രൂക്ഷമാണ്.കഴിഞ്ഞ രാത്രിയിലും ജനവാസ കേന്ദ്രത്തിലെത്തിയ കാട്ടാനക്കൂട്ടം വ്യാപകമായി കൃഷി നശിപ്പിച്ചിരുന്നു.
കാട്ടാനക്കൂട്ടത്തെ കണ്ട പ്രദേശവാസികള്‍ വിവരമറിയിച്ചതിനെ തുടര്‍ന്ന് സുഹൃത്തായ രാജേന്ദ്രനൊപ്പം സംഭവസ്ഥലത്തേക്ക് ഇരുചക്രവാഹനത്തില്‍ പോകവേ വഴിമധ്യേ കാട്ടാനക്കൂട്ടത്തിന്റെ മുന്‍പിലകപ്പെടുകയായിരുന്നു.രാജേന്ദ്രനാണ് വാഹനം ഓടിച്ചിരുന്നത്.വിവരമറിഞ്ഞ് പിന്നീടെത്തിയ വനംവകുപ്പധികൃതരെ നാട്ടുകാര്‍ തടയുകയും ചെയ്തു.
