പാലക്കാട്: മൂന്നു ദിവസങ്ങളായി നാടിനെ വിറപ്പിച്ച കാട്ടാനകൾ കാടുകയറിയത് ഇന്നലെ രാത്രിയോടെ. ഭാരതപ്പുഴ പറളി ഭാഗത്തുനിന്നും തുരത്തിയ കാട്ടാനകളെ മുണ്ടൂർ പഞ്ചായത്തിലെ വള്ളിക്കോടൻ മലയിലേക്കാണ് കയറ്റിയത്. പടക്കം പൊട്ടിക്കാൻ തുടങ്ങിയതോടെ ആനകൾ റെയിൽപാളം മുറിച്ചുകടന്നു.
കിണാവല്ലൂർ വില്വംകാട് വഴി കാട്ടിലേക്കു പോകുംവഴിയും ആനകൾ പരാക്രമങ്ങൾ കാട്ടിയിരുന്നു. വില്വംകാട് രത്നത്തിന്‍റെ റബർതോട്ടത്തിന്റെ മതിലും തകർത്തു. വഴുക്കപ്പാറ ചന്ദ്രശേഖരന്‍റെ വീടിന്‍റെ മതിലോരത്തുള്ള പട്ടിക്കൂടും മറിച്ചിട്ടു. പകൽ മുഴുവൻ പറളി പ്രദേശത്തെയാകെ വിറപ്പിച്ച ആനകളെ കാട്ടിലേക്കു വിട്ടതോടെയാണ് നാട്ടുകാരുടെ ശ്വാസം വീണത്.
കന്പ വള്ളിക്കോട് ഭാഗത്തുനിന്ന് ഇന്നലെ പുലർച്ചെയോടെയാണ് ആനകൾ റെയിൽ കടന്നു പറളിയിലെത്തിയത്. പറളി പുഴയിൽ മേൽപ്പാലത്തിനു സമീപം നിലയുറപ്പിച്ച ആനകൾ തീറ്റയും കുളിയുമായി പകൽ മുഴുവൻ കഴിച്ചുകൂട്ടുകയായിരുന്നു.
