മീ​ന​ച്ചി​ലാ​റി​ന്‍റെ തീ​ര​ത്ത് പ്ര​കൃ​തി ഒ​രു​ക്കി​യ മിനി ബീച്ച്; കാ​വാ​ലി​പ്പു​ഴ​ കടവിനെ സിനിമയിലെടുത്ത് സം​വി​ധാ​യ​ക​ൻ ജ​യ​രാ​ജ്

കോ​ട്ട​യം: കി​ട​ങ്ങൂ​ർ കാ​വാ​ലി​പ്പു​ഴ ക​ട​വി​നെ സി​നി​മ​യി​ലും എ​ടു​ത്തു. കാ​വാ​ലി​പു​ഴ ക​ട​വ് മി​നി​ബീ​ച്ചി​ന്‍റെ ഭം​ഗി അ​ഭ്ര​പാ​ളി​യി​ലൂ​ടെ കാ​ണാ​ൻ ആ​ഗ്ര​ഹി​ച്ചി​രു​ന്ന നി​ര​വ​ധി ആ​ളു​ക​ൾ​ക്ക് സ്വ​പ്ന സാ​ക്ഷാ​ത്കാ​ര​മാ​യി സം​വി​ധാ​യ​ക​ൻ ജ​യ​രാ​ജി​ന്‍റെ പു​തി​യ ചി​ത്ര​മാ​യ പ്ര​കാ​ശം പ​ര​ത്തു​ന്ന ഒ​രു പെ​ണ്‍​കു​ട്ടി എ​ന്ന സി​നി​മ​യി​ലാ​ണ് കോ​ട്ട​യം ജി​ല്ല​യു​ടെ സ്വ​ന്തം ബീ​ച്ച് എ​ന്നു വി​ശേ​ഷി​പ്പി​ക്കാ​വു​ന്ന ഗ്രാ​മീ​ണ വി​നോ​ദ സ​ഞ്ചാ​ര കേ​ന്ദ്രം കൂ​ടി​യാ​യ കാ​വാ​ലി​പ്പു​ഴ ക​ട​വ് സി​നി​മ​യി​ലെ​ത്തു​ന്ന​ത്.

ലൊ​ക്കേ​ഷ​ൻ സന്ദർശിക്കാനായി സം​വി​ധാ​യ​ക​ൻ ജ​യ​രാ​ജും മി​ക​ച്ച കാ​മ​റ​മാ​നു​ള്ള ദേ​ശീ​യ അ​വാ​ർ​ഡ് നേ​ടി​യ നി​ഖി​ൽ എ​സ്.​പ്ര​വീ​ണും ഇ​ന്ന​ലെ കാ​വാ​ലി​പ്പു​ഴ ക​ട​വി​ലെ​ത്തി​യി​രു​ന്നു.

ലൊ​ക്കേ​ഷ​ൻ വ​ള​രെ ഇ​ഷ്്ട​മാ​യ സം​വി​ധാ​യ​ക​ൻ ജ​യ​രാ​ജ് ഉ​ട​ൻ ഷൂ​ട്ടിം​ഗി​നാ​യി എ​ത്തു​മെ​ന്നും അ​റി​യി​ച്ചു. കോ​വി​ഡ് നി​യ​ന്ത്ര​ണ​ങ്ങ​ൾ മാ​റി​ക​ഴി​ഞ്ഞാ​ൽ ഉ​ട​ൻ ഷൂ​ട്ടിം​ഗ് തു​ട​ങ്ങും. പ്ര​മു​ഖ താ​ര​ങ്ങ​ൾ അ​ഭി​ന​യി​ക്കു​ന്ന സി​നി​മ​യി​ലെ ഗാ​ന​ങ്ങ​ൾ ഉ​ൾ​പ്പെ​ടെ​യു​ള്ള രം​ഗ​ങ്ങ​ൾ ഇ​വി​ടെ ചി​ത്രീ​ക​രി​ക്കാ​നാണ് ഉ​ദ്ദേ​ശി​ക്കു​ന്ന​ത്.

പ്ര​ള​യ​കാ​ല​ത്ത് മീ​ന​ച്ചി​ലാ​റി​ന്‍റെ തീ​ര​ത്ത് പ്ര​കൃ​തി ഒ​രു​ക്കി​യ മ​ണ​ൽ​തി​ട്ട​യാ​ണ് കാ​വാ​ലി​പ്പു​ഴ ക​ട​വ്. 200 മീ​റ്റർ നീ​ള​ത്തി​ലും 100 മീ​റ്റ​ർ വീ​തി​യി​ലു​മാ​യി അ​ര​യേ​ക്ക​റോ​ളം ഭാ​ഗ​ത്ത് പ​ഞ്ച​സാ​ര മ​ണ​ൽ അ​ടി​ഞ്ഞു കൂ​ടി​യി​രി​ക്കു​ക​യാ​ണ്. ഇ​താ​ണ് കാ​വാ​ലി​പ്പു​ഴ ക​ട​വി​നെ മി​നി ബീച്ചാ​ക്കി മാ​റ്റി​യ​ത്.