കൊച്ചി: അപകീര്‍ത്തികരമായ ദൃശ്യങ്ങള്‍ പകര്‍ത്താന്‍ ക്വട്ടേഷന്‍ പ്രകാരം നടിയെ തട്ടിക്കൊണ്ടുപോയി പീഡിപ്പിച്ചെന്ന കേസിലെ 34ാം സാക്ഷി കാവ്യ മാധവന്‍ വിസ്താരത്തിനിടെ കൂറുമാറിയതായി പ്രോസിക്യൂഷന്.
വിചാരണക്കോടതി മുമ്പാകെ സാക്ഷിയുടെ കൂറുമാറ്റം പ്രഖ്യാപിച്ച പ്രോസിക്യൂഷന് കാവ്യ മാധവനെ ക്രോസ് വിസ്താരം നടത്താന്‍ അനുമതി തേടി. കോടതിയുടെ അനുമതിയോടെ കാവ്യയെ ഒരുമണിക്കൂര്‍ ക്രോസ് ചെയ്തു. വിസ്താരം ഇന്നും തുടരും.
അതിക്രമം നേരിട്ട നടിയോട്, കാവ്യയുടെ ഭര്‍ത്താവും കേസിലെ മുഖ്യപ്രതികളിലൊരാളുമായ നടന്‍ ദിലീപിനു ശത്രുതയുണ്ടെന്ന പ്രോസിക്യൂഷന് വാദത്തെ സാധൂകരിക്കാനാണു കാവ്യയെ സാക്ഷിപ്പട്ടികയില്‍ ഉള്‍പ്പെടുത്തി വിസ്തരിച്ചത്.
സിനിമാ സംഘടനയായ അമ്മയുടെ സ്റ്റേജ്‌ഷോയുടെ റിഹേഴ്‌സല്‍ ക്യാന്പ് നടന്ന ഹോട്ടലില്‍ കേസിലെ ഇരയായ നടിയും ദിലീപും തമ്മില്‍ വാക്കുതര്‍ക്കമുണ്ടായപ്പോള്‍ ഒപ്പം കാവ്യ ഉണ്ടായിരുന്നതായി മൊഴി ലഭിച്ചിരുന്നു.
ഇക്കാര്യം കോടതി മുമ്പാകെ ബോധിപ്പിക്കാനാണു കേസില്‍ കാവ്യയെ 34-ാം സാക്ഷിയാക്കിയത്. കാവ്യ കൂറുമാറിയതോടെ കേസില്‍ വിശദമായ ക്രോസ് വിസ്താരത്തിന് ഒരുങ്ങുകയാണു പ്രോസിക്യൂഷന്.
