കൊച്ചി: കേരളാ കോണ്ഗ്രസിന്റെ തെരഞ്ഞെടുപ്പ് ചിഹ്നം രണ്ടില ജോസ് കെ. മാണി വിഭാഗത്തിന് അനുവദിച്ച തെരഞ്ഞെടുപ്പ് കമ്മീഷൻ വിധിക്കു ഹൈക്കോടതി സ്റ്റേ. ഒരു മാസത്തേക്കാണു സ്റ്റേ ചെയ്തത്.
പി.ജെ. ജോസഫിന്റെ ഹർജി ഫയലിൽ സ്വീകരിച്ചാണു ഹൈക്കോടതി സ്റ്റേ വിധിച്ചത്. തെരഞ്ഞെടുപ്പ് കമ്മീഷൻ നടപടിയെ ചോദ്യം ചെയ്താണു ജോസഫ് കോടതിയെ സമീപിച്ചത്.
വസ്തുതകൾ പരിശോധിക്കാതെയാണു തെരഞ്ഞെടുപ്പ് കമ്മീഷൻ ജോസ് കെ. മാണി വിഭാഗത്തിനു ചിഹ്നം അനുവദിച്ചതെന്നു ജോസഫ് ഹർജിയിൽ ചൂണ്ടിക്കാട്ടി.
കെ.എം. മാണിയുടെ മരണത്തെത്തുടർന്നു യഥാർഥ കേരള കോണ്ഗ്രസ് ആരെന്ന തർക്കം നിലനിൽക്കെ കഴിഞ്ഞയാഴ്ചയാണു രണ്ടില ചിഹ്നം ജോസ് കെ. മാണി പക്ഷത്തിനു നൽകാൻ കേന്ദ്ര തെരഞ്ഞെടുപ്പു കമ്മിഷൻ തീരുമാനിച്ചത്. കമ്മീഷണർ അശോക് ലവാസയുടെ വിയോജനക്കുറിപ്പോടെയായിരുന്നു തീരുമാനം.
നേരത്തെ ജോസ് കെ. മാണിയെ ചെയർമാൻ സ്ഥാനം ഏറ്റെടുക്കുന്നതിൽനിന്നു തടയാൻ കോടതി വിധിയിലൂടെ ജോസഫിനു കഴിഞ്ഞിരുന്നു.
