സെബി മാത്യു
ന്യൂഡല്‍ഹി: വിവാദ കാര്‍ഷിക നിയമങ്ങളില്‍ പ്രതിഷേധിച്ച് കര്‍ഷകര്‍ പ്രഖ്യാപിച്ച ഭാരത ബന്ദിന് പിന്തുണയുമായി വിവിധ സംസ്ഥാനങ്ങളില്‍ നിന്ന് ആയിരങ്ങള്‍ ഡല്‍ഹി അതിര്‍ത്തികളിലേക്ക് ഒഴുകി എത്തുന്നു.
ഇതിനോടകം തന്നെ, കേരളം, തമിഴ്‌നാട്, ആന്ധ്രപ്രദേശ്, കര്‍ണാടക, മഹാരാഷ്ട്ര തുടങ്ങിയ ദക്ഷിണേന്ത്യന്‍ സംസ്ഥാനങ്ങളില്‍ നിന്നുള്ള കര്‍ഷകരും സന്നദ്ധ പ്രവര്‍ത്തകരും ഡല്‍ഹി-ഹരിയാന അതിര്‍ത്തിയായ സിംഗുവില്‍ എത്തി കര്‍ഷകര്‍ക്ക് ഐക്യദാര്‍ഡ്യം പ്രഖ്യാപിച്ച് ഒപ്പം സമരം ചെയ്യുന്നുണ്ട്.
മറ്റു സംസ്ഥാനങ്ങളുമായി ഡല്‍ഹി അതിര്‍ത്തി പങ്കിടുന്ന അഞ്ചു സ്ഥലങ്ങളിലാണ് കര്‍ഷകര്‍ സര്‍വ്വ സന്നാഹങ്ങളുമായി തമ്പടിച്ചിരിക്കുന്നത്. പ്രധാനമായും സിംഗു അതിര്‍ത്തി കേന്ദ്രീകരിച്ചാണ് കര്‍ഷകര്‍കര്‍ സമരം ചെയ്യുന്നത്.
സിംഗു അതിര്‍ത്തിയില്‍ കര്‍ഷകര്‍ക്കുള്ള സജ്ജീകരണങ്ങള്‍ വിലയിരുത്തുന്നതിനായി ഡല്‍ഹി മുഖ്യമന്ത്രി അരവിന്ദ് കേജരിവാളും സംസ്ഥാന മന്ത്രിമാരും ഇന്ന് ഇവിടം സന്ദര്‍ശിക്കുന്നുണ്ട്.നൂറുകണക്കിന്ന് ട്രാക്ടറുകളും ട്രക്കുകളും ഉള്‍പ്പടെയുള്ള വാഹനങ്ങള്‍ ഭക്ഷണവും അവശ്യവസ്തുക്കളുമായി ഇവിടെ ക്യാമ്പ് ചെയ്യുന്നു.
കര്‍ഷക സമരം പന്ത്രണ്ടാം ദിവസത്തിലേക്ക് കടക്കുന്നതോടെ സമരമുഖത്തെ വനിത പ്രാതിനിധ്യവും കൂടി വരികയാണ്. ഉത്തരാഖണ്ഡ്, ഹരിയാന, ഉത്തര്‍പ്രദേശ്, പഞ്ചാബ്, രാജസ്ഥാന്‍ തുടങ്ങിയ സംസ്ഥാനങ്ങളില്‍ നിന്ന് ആയിരക്കണക്കിന് കര്‍ഷക വനിതകളാണ് സമരത്തിനെത്തിയിരിക്കുന്നത്.
രാജസ്ഥാനില്‍ ഇന്നലെ നൂറുകണക്കിന് ആശ വര്‍ക്കര്‍മാരാണ് സമരത്തിന് ഐക്യദാര്‍ഡ്യം പ്രഖ്യാപിച്ച് എത്തിയത്.ലോകത്തെ തന്നെ അമ്പരപ്പിക്കും വിധമാണ് സിംഗു അതിര്‍ത്തിയില്‍ സമരം ചെയ്യുന്ന കര്‍ഷകരുടെ സമര രീതിയും സജ്ജീകരണങ്ങളും.
പ്രദേശത്ത് കര്‍ഷകര്‍ പാലിക്കുന്ന ശുചിത്വമാണ് ഏറെ പ്രധാനം. പതിനായിരക്കണക്കിന് ആളുകളാണ് സിംഗു അതിര്‍ത്തിയില്‍ തമ്പടിച്ചിരിക്കുന്നത്. പ്രാഥമീക ആവശ്യങ്ങള്‍ക്കായി സുലഭ് ബയോ ടോയ്‌ലറ്റുകള്‍ സ്ഥാപിച്ചിട്ടുണ്ട്.
വലിയ ടാങ്കറുകളിലും മറ്റുമായി വെള്ളവും എത്തിച്ചിരിക്കുന്നു. ഓരോ ദിവസവും രാവിലെയും വൈകുന്നേരവും യുവാക്കള്‍ ഉള്‍പ്പടെ സമര സ്ഥലത്തെയും സമീപ പ്രദേശങ്ങളിലെയും കടലാസുകളും ചപ്പുചവറുകളും നീക്കി ശുചിയാക്കുന്നു.
എപ്പോള്‍ ചെന്നു നോക്കിയാലും ഇത്ര വലിയൊരു സമരം നടക്കുന്ന സ്ഥലമാണെന്നു തോന്നുകയേയില്ല. അത്രയ്ക്കു വൃത്തിയോടെയാണ് സമരസ്ഥലവും പരിസരവും കര്‍ഷകര്‍ പരിപാലിക്കുന്നത്. ട്രാക്ടറുകള്‍ക്ക് പുറമേ കര്‍ഷകരോടൊപ്പം കന്നുകാലികളും കൂട്ടത്തോടെയുണ്ട്.
അതുപോലെ തന്നെ മറ്റൊരു അത്ഭുതമാണ് ഡല്‍ഹി അതിര്‍ത്തികളില്‍ രാപകല്‍ വിശ്രമമില്ലാതെ കര്‍ഷകര്‍ക്കു വേണ്ടി പ്രവര്‍ത്തിക്കുന്ന അടുക്കളകള്‍. സമരം കാണാനും ഐക്യദാര്‍ഡ്യം പ്രഖ്യാപിച്ചും എത്തുന്ന ആരെയും വെറുവയറോടെ മടങ്ങാന്‍ കര്‍ഷകര്‍ അനുവദിക്കില്ല.
ഉച്ചയ്ക്കും രാത്രിയും ചോറ്, കടലക്കറി, ആലുഗോബി, പായസം. രാവിലെയും വൈകിട്ടും എല്ലാവര്‍ക്കും ചായയും ഉരുളക്കിഴങ്ങ് വറുത്തതും ജിലേബിയും. പ്രക്ഷോഭവേദികള്‍ക്കു സമീപം 100 ലിറ്റര്‍ പാത്രത്തില്‍ പകല്‍ മുഴുവന്‍ ചായ തിളയ്ക്കുന്നു.
പാചകവും വിളമ്പലുമെല്ലാം കര്‍ഷകര്‍തന്നെ. ”ബഹാദുര്‍ഘട്ടില്‍ നിന്നാണ് പാചകം ചെയ്യാനുള്ള വലിയ പാത്രങ്ങള്‍ എത്തിച്ചത്. കഴിഞ്ഞദിവസം ഒരാള്‍ 100 കന്നാസ് ശുദ്ധജലം എത്തിച്ചു.
പുലര്‍ച്ചെ അഞ്ചിന് ആദ്യ ചായ. ഉച്ചയ്ക്കും വൈകിട്ടും രാത്രിയും ഭക്ഷണമുണ്ടെന്നാണ് തിക്രിയിലെ അടുക്കളയുടെ ചുമതലയുള്ള റോഹ്തക്കിലെ കര്‍ഷകന്‍ രാംകേഷ് സിംഗ് പറഞ്ഞു.ഗാസിപ്പുരിലെ താത്ക്കാലിക അടുക്കളകള്‍ക്ക് ഡല്‍ഹി ഗുരുദ്വാര മാനേജ്മെന്റ് കമ്മിറ്റിയുടെ സഹായമുണ്ട്.
കഴിഞ്ഞദിവസം 125 കിലോ അരിയും 2.5 ക്വിന്റല്‍ പരിപ്പും രണ്ട് ക്വിന്റല്‍ പച്ചക്കറിയും എത്തിച്ചു. കൂടുതല്‍ കര്‍ഷകര്‍ അണിനിരന്ന സിംഗുവിലെ അടുക്കളകള്‍ക്ക് പഞ്ചാബിലെ ഹോഷിയാര്‍പുര്‍ ഗുരുദ്വാര കമ്മിറ്റിയാണ് നേതൃത്വം നല്‍കുന്നത്. ദിവസവും പതിനായിരത്തോളം പേര്‍ക്ക് ഭക്ഷണം വിളമ്പുന്നുണ്ട് ഇവിടെ നിന്ന്.
അരിയും പരിപ്പും ഗോതമ്പും ഉള്‍പ്പടെ ആറുമാസത്തേക്കുള്ള ഭക്ഷ്യ ധാന്യങ്ങള്‍ കരുതലുണ്ട്. പച്ചക്കറികള്‍ പല സ്ഥലങ്ങളില്‍ നിന്നായി ദിവസേന എത്തുന്നുണ്ട്. സര്‍ക്കാരുമായുള്ള ചര്‍ച്ചകളില്‍ പങ്കെടുക്കുമ്പോള്‍ പോലും കര്‍ഷക നേതാക്കള്‍ ഇവിടെ നിന്നും പാകം ചെയ്ത് എത്തിക്കുന്ന ഭക്ഷണം മാത്രമാണ് കഴിക്കുന്നത്.
