തളിപ്പറമ്പ്: ഒരു സുരക്ഷയുമില്ലാതെ റോഡരികില്‍ സ്ഥാപിച്ച വൈദ്യുതി ട്രാന്‍സ്‌ഫോര്‍മര്‍ ഭീതി പരത്തുന്നു. വേളിപ്പാറ കുറുമാത്തൂര്‍ ആയുര്‍വേദ വൈദ്യശാല റോഡിലാണ് സര്‍ സയ്യിദ് കോളജ് മതിലിനോട് ചേര്‍ന്ന് ട്രാന്‍സ്‌ഫോര്‍മര്‍ സ്ഥാപിച്ചിട്ടുള്ളത്.
വിദ്യാര്‍ഥികളും പ്രായമായവരും ഉള്‍പ്പെടെ നിരവധിപേര്‍ കാല്‍നടയായും ഇരുചക്രവാഹനങ്ങളിലും ഇതുവഴി സഞ്ചരിക്കുന്നുണ്ട്. ഇവിടെ ട്രാന്‍സ്‌ഫോര്‍മര്‍ സ്ഥാപിക്കുമ്പോള്‍ തന്നെ അപകടസാധ്യത നാട്ടുകാര്‍ ചൂണ്ടിക്കാട്ടിയിരുന്നു.
ഇവിടെ സുരക്ഷാവേലി സ്ഥാപിക്കുമെന്നായിരുന്നു അധികൃതര്‍ പറഞ്ഞിരുന്നതെങ്കിലും യാതൊന്നും തന്നെ നടന്നില്ല. അടിയന്തിരമായി ട്രാന്‍സ്‌ഫോര്‍മറിനു സുരക്ഷാവേലി സ്ഥാപിക്കണമെന്ന് ആവശ്യപ്പെട്ട് പ്രദേശവാസികള്‍ കെഎസ്ഇബി അധികൃതര്‍ക്ക് നിവേദനം നല്‍കിയിട്ടുണ്ട്.
