നെടുന്പാശേരി: കൊച്ചി അന്താരാഷ്ട്ര വിമാനത്താവളത്തിൽ എയർ ഇന്ത്യ വിമാനം ലാൻഡിംഗിനിടെ റണ്‍വേയിൽനിന്ന് തെന്നിമാറി കാനയിൽ വീണ സംഭവത്തിനു പിന്നിൽ പ്രധാന പൈലറ്റ് തന്നേക്കാൾ പ്രായം കുറഞ്ഞ വനിതാ സഹപൈലറ്റിന്‍റ നിർദേശം അവഗണിച്ചതാണെന്ന് അന്വേഷണത്തിൽ വ്യക്തമായി. മോശം കാലാവസ്ഥയെത്തുടർന്നാണ് വിമാനം തെന്നിമാറി കാനയിൽ വീണതെന്നാണ് ആദ്യം നൽകിയിരുന്ന വിശദീകരണം.
എന്നാൽ സിജിസിഎ നടത്തിയ വിശദമായ അന്വേഷണത്തിലാണ് യഥാർഥ കാരണം പുറത്തുവന്നത്. 2017 സെപ്റ്റംബർ രണ്ടിനാണ് 102 യാത്രക്കാരുമായി എയർ ഇന്ത്യയുടെ ഐഎക്സ് 452 നന്പർ അബുദാബി കൊച്ചി വിമാനം ലാൻഡിംഗിനിടെ റണ്‍വെയിൽനിന്നു തെന്നിമാറി കാനയിൽ വീണത്.
പ്രായത്തിൽ തന്നേക്കാൾ 30 വയസും പ്രവൃത്തിപരിചയത്തിൽ 13,000 മണിക്കൂറും കുറവുള്ള വനിതാ സഹപൈലറ്റിന്‍റെ നിർദേശം പ്രധാന പൈലറ്റ് അവഗണിച്ചതാണ് അപകടത്തിന് കാരണമെന്നാണ് ഡിജിസിഎയുടെ കണ്ടെത്തൽ. അപകടത്തിൽ മൂന്നു യാത്രികർക്ക് പരിക്കേറ്റിരുന്നു. വിമാനത്തിനും കാര്യമായ കേടുപാടുകൾ സംഭവിച്ചു.
സംഭവത്തിനു പിന്നാലെ പ്രായത്തിൽ വലിയ അന്തരവുള്ളവരെ ഒന്നിച്ചു ജോലിക്കിടുന്നത് ഒഴിവാക്കാൻ വ്യോമയാന മന്ത്രാലയം എയർ ഇന്ത്യക്കു നിർദേശം നൽകി. പ്രധാന പൈലറ്റിന്‍റെ തെറ്റായ തീരുമാനമാണ് അപകടത്തിന് കാരണമെന്നാണ് റിപ്പോർട്ടിൽ വ്യക്തമാക്കുന്നത്. ശക്തമായ മഴയെത്തുടർന്ന് റൺവേ കാണാൻ കഴിയുന്നില്ലെന്നും അതിനാൽ ഫോളോ മീ വാഹനം ഉപയോഗിച്ച് വേഗത കുറയ്ക്കണമെന്നും വനിതാ സഹപൈലറ്റ് ആവശ്യപ്പെട്ടിരുന്നു.
പ്രധാന പൈലറ്റ് ഇത് കണക്കിലെടുക്കാതെ ലാൻഡിംഗ് നടത്തുകയായിരുന്നു. സംഭവസമയത്ത് പ്രധാന പൈലറ്റ് മദ്യപിച്ചുരുന്നതായും നേരത്തെ കണ്ടെത്തിയിരുന്നു. ഇതേത്തുടർന്ന് മൂന്ന് മാസത്തേക്ക് അദ്ദേഹത്തിന്‍റെ ലൈസൻസ് റദ്ദാക്കിയിരുന്നതായും റിപ്പോർട്ടിൽ വ്യക്തമാക്കുന്നു.
