കൊല്ലം: കൊല്ലം നിയമസഭാ സീറ്റും ആര്‍എസ്പി ആവശ്യപ്പെട്ടാല്‍ കോണ്‍ഗ്രസ് നല്‍കുമെന്ന് ആര്‍എസ്പിയെ പരിഹസിച്ചു നിയുക്ത മാവേലിക്കര എം.പി കൊടിക്കുന്നില്‍ സുരേഷ്. കൊല്ലം പ്രസ്ക്ലബ് സംഘടിപ്പിച്ച മുഖാമുഖത്തില്‍ സംസാരിക്കുകയായിരുന്നു അദ്ദേഹം.
മുന്നണി മാറിയെത്തിയപ്പോള്‍ ആവശ്യപ്പെട്ട കൊല്ലം ലോക്സഭാ സീറ്റ് ആര്‍എസ്പിക്ക് കൊടുക്കാമെങ്കില്‍ സിപിഎം പണ്ട് ആര്‍എസ്പിയില്‍ നിന്നും ഏറ്റെടുത്ത കൊല്ലം നിയമസഭാ സീറ്റും അവര്‍ക്ക് നല്‍കാമെന്നും കൊടിക്കുന്നില്‍ പരിഹാസരൂപേണെ പറഞ്ഞു.തെരഞ്ഞെടുപ്പില്‍ എന്‍എസ്എസ് പിന്തുണ യുഡിഎഫിന് ആയിരുന്നു.
മുഖ്യമന്ത്രിയുടെ കരണക്കുറ്റിക്കുള്ള അടിയാണ് എന്‍എസ്എസ് പിന്തുണ. മാവേലിക്കര മണ്ഡലത്തിലെ എല്‍ഡിഎഫ് സ്ഥാനാര്‍ഥിയെ ഓഫീസില്‍ സ്വീകരിച്ചതിന് മാവേലിക്കര എന്‍എസ്എസ് യൂനിയന്‍ ഒന്നാകെ നേതൃത്വം പിരിച്ചുവിടുകയായിരുന്നു.
ശബരിമലയില്‍ യുവതീപ്രവേശനം പാടില്ലെന്ന നിലപാടാണ് എന്‍എസ്്എസിന്. അതേ നിലപാടാണ് യുഡിഎഫിനെന്നും കൊടിക്കുന്നിൽ സുരേഷ് പറഞ്ഞു.
