കിംഗ്സ്റ്റണ്‍: ഇതിഹാസ താരം സച്ചിൻ ടെണ്ടുൽക്കറുടെ പേരിലുള്ള മറ്റൊരു റിക്കാർഡ് കൂടി ഇന്ത്യൻ നായകൻ വിരാട് കോഹ്‌ലി മറികടന്നു. ഏകദിന മത്സരത്തിലെ മറുപടി ബാറ്റിംഗിൽ ഏറ്റവും കൂടുതല്‍ സെഞ്ചുറിയെന്ന സച്ചിന്‍റെ റിക്കാർഡാണ് കോഹ്‌ലി മറികടന്നത്. ടീം രണ്ടാമത് ബാറ്റ് ചെയ്തപ്പോള്‍ കോഹ്‌ലി 18 തവണയാണ് സെഞ്ചുറി അടിച്ചത്. എന്നാൽ സച്ചിന്‍റെ പേരിൽ 17 സെഞ്ചുറി മാത്രമാണുള്ളത്. 232 ഇന്നിംഗ്സുകളില്‍ നിന്നായിരുന്നു സച്ചിന്‍റെ നേട്ടമെങ്കിൽ 102 ഇന്നിംഗ്സുകള്‍ മാത്രം കളിച്ചാണ് കോഹ്‌ലി നാഴികക്കല്ല് പിന്നിട്ടത്.
വെസ്റ്റ് ഇൻഡീസിനെതിരായ അവസാനത്തെ ഏകദിനത്തിൽ സെഞ്ചുറി നേടിയതോടെയാണ് റൺ ചേസിംഗിൽ ഏറ്റവുമധികം സെഞ്ചുറിയെന്ന നേട്ടത്തിൽ കോഹ്‌ലി എത്തിയത്.115 പന്തിൽ രണ്ട് സിക്സും 12 ഫോറുകളുടേയും അകമ്പടിയോടെ ആയിരുന്നു സെഞ്ചുറി. ഏകദിന കരിയറിലെ 28-ാം സെഞ്ചുറിയാണ് കോഹ്‌ലി നേടിയത്. ഇതോടെ ഏറ്റവുമധികം സെഞ്ചുറികളുടെ കണക്കിൽ ശ്രീലങ്കൻ മുൻ താരം സനത് ജയസൂര്യയുടെ ഒപ്പമെത്തി കോഹ്‌ലി.
