ന്യൂഡൽഹി: ഐസിസി ടെസ്റ്റ് റാങ്കിംഗിൽ 900 പോയിന്റ് എന്ന കടന്പ പിന്നിട്ട് ഇന്ത്യൻ ക്രിക്കറ്റ് ടീം നായകൻ വിരാട് കോഹ്ലി. സുനിൽ ഗവാസ്കറിനുശേഷം ഈ നേട്ടം പിന്നിടുന്ന രണ്ടാമത് ഇന്ത്യൻ കളിക്കാരനും 31മത് അന്താരാഷ്ട്ര താരവുമാണു കോഹ്ലി.
തന്‍റെ 50-ാം ടെസ്റ്റിലാണ് ഗാവസ്കർ 900 പോയിന്റ് എന്ന കടന്പ പിന്നിട്ടത്. 1979ൽ ഓവലിൽ നടന്ന ആ ടെസ്റ്റിൽ ഗവാസ്കർ ഇരട്ടസെഞ്ചുറി നേടിയിരുന്നു. സെഞ്ചൂറിയൻ ടെസ്റ്റ് സെഞ്ചുറിക്കു പിന്നാലെയാണ് കോഹ്ലിയും 900 പോയിന്റ് പിന്നിട്ടത്. കോഹ്ലിയുടെ 65മത് ടെസ്റ്റായിരുന്നു ഇത്. ദക്ഷിണാഫ്രിക്കയ്ക്കെതിരേ ആദ്യ ഇന്നിംഗ്സിൽ കോഹ്ലി 153 റണ്‍സ് നേടി പുറത്തായി.
സച്ചിൻ തെണ്ടുൽക്കറും രാഹുൽ ദ്രാവിഡുമാണ് ഇതിനുമുന്പ് 900 പോയിന്റ് എന്ന നേട്ടത്തിന് അടുത്തെത്തിയ മറ്റ് ഇന്ത്യൻ താരങ്ങൾ. സച്ചിൻ 2002ൽ 898 പോയിന്റും ദ്രാവിഡ് 2005ൽ 892 പോയിന്റും നേടിയിരുന്നു. 961 പോയിന്റുമായി ഡോണ് ബ്രാഡ്മാനാണ് പോയിന്റ് പട്ടികയിൽ മുന്നിൽനിൽക്കുന്നത്. ഓസ്ട്രേലിയൻ നായകൻ സ്റ്റീവ് സ്മിത്ത് 947 പോയിന്റുമായി രണ്ടാമതുണ്ട്.
