പെർത്ത്: ഓസ്ട്രേലിയയ്ക്കെതിരായ രണ്ടാം ക്രിക്കറ്റ് ടെസ്റ്റിൽ സെഞ്ചുറി നേടിയതോടെ ഇന്ത്യൻ ക്യാപ്റ്റൻ വിരാട് കോഹ്ലി വീണ്ടും റിക്കാർഡ് ബുക്കിൽ ഇടംനേടി. ഓസ്ട്രേലിയക്കെതിരെ ആവരുടെ നാട്ടിൽ ഏറ്റവും കൂടുതൽ സെഞ്ചുറികൾ നേടുന്ന ഇന്ത്യൻ താരങ്ങളിൽ സച്ചിൻ തെണ്ടുൽക്കറുടെ റിക്കാഡിനൊപ്പമെത്തി കോഹ്ലി.
ഓസീസിനെതിരേ അവരുടെ മണ്ണിൽ കോഹ്ലി നേടുന്ന ആറാം സെഞ്ചുറിയായിരുന്നു പെർത്തിലേത്. 20 ടെസ്റ്റ് മത്സരങ്ങളിൽ നിന്നാണ് സച്ചിൻ ഓസീസ് മണ്ണിൽ ആറു സെഞ്ചുറികൾ നേടിയത്.
അഞ്ചു സെഞ്ചുറികൾ നേടിയ സുനിൽ ഗാവസ്ക്കറിനെ പിന്തള്ളാനും കോഹ്ലിക്കു സാധിച്ചു. ഓസീസ് മണ്ണിൽ ഏറ്റവും വേഗത്തിൽ 1000 റണ്‍സ് തികയ്ക്കുന്ന ഇന്ത്യൻ താരമെന്ന റിക്കാർഡ് ആദ്യ ടെസ്റ്റിനിടെ കോഹ്ലി സ്വന്തമാക്കിയിരുന്നു.
