അഡ്ലെയ്ഡ്: ഓസ്ട്രേലിയയ്ക്കെതിരായ ടെസ്റ്റ് പരന്പരയിൽ ഇന്ത്യൻ നായകൻ വിരാട് കോഹ്ലിക്ക് നിരാശപ്പെടുത്തുന്ന തുടക്കമാണ് ലഭിച്ചത്. ഓസീസ് താരം ഉസ്മാൻ ഖവാജയാണ് കോഹ്ലിയുടെ നിരാശയ്ക്കു കാരണം. കാരണം ഖവാജയുടെ സൂപ്പർമാൻ ക്യാച്ചാണ് കോഹ്ലിയെ മടക്കിയത്.
പാറ്റ് കമ്മിൻസിന്‍റെ പന്ത് ഡ്രൈവ് ചെയ്യാനായിരുന്നു കോഹ്ലിയുടെ ശ്രമം. എന്നാൽ ഓഫ് സ്റ്റംപിനു പുറത്തുപോയ ഫുൾ ലെംഗ്ത് പന്തിൽ ബാറ്റുവച്ച കോഹ്ലിക്കു പിഴച്ചു. ഗള്ളിയിലേക്കു പോയ പന്ത് ഖവാജയുടെ ഇടത് വശത്താണ് എത്തിയത്. മിന്നൽവേഗത്തിൽ ഒരു മുഴുനീള ഡൈവിലൂടെ ഇടംകൈയിൽ ഖവാജ പന്ത് കൈയിലാക്കി.
നാലു പന്തിനിടെ ഇത് രണ്ടാം തവണയാണ് കോഹ്ലി കമ്മിൻസിന് ഇരയാകുന്നത്. അഡ്ലെയ്ഡിൽ പുറത്താകുന്പോൾ 16 പന്തിൽ മൂന്നു റണ്‍സായിരുന്നു ഏറെ പ്രതീക്ഷകളുമായി തുടങ്ങിയ നായകന്‍റെ സന്പാദ്യം.
