കോഴഞ്ചേരി: രണ്ട് ദിവസമായി ഉപേക്ഷിക്കപ്പെട്ട നിലയില്‍ കാണപ്പെട്ട പശുവിന് തീറ്റയും വെള്ളവും കൊടുത്ത് സംരക്ഷിക്കുകയാണ് എസ്എച്ച്ഒ കെ. എസ്. ഗോപകുമാറിന്‍റെ നേതൃത്വത്തിലുളള കോയിപ്രത്തെ പോലീസ് സേനാംഗങ്ങള്‍.
തിരുവല്ല – കുമ്പഴ സംസ്ഥാന പാതയിലെ മാരാമണ്‍ ജംഗ്ഷന് സമീപത്തുള്ള പറമ്പില്‍ രണ്ടു ദിവസമായി ക്ഷീണാവസ്ഥയില്‍ ഒരു പശു നില്‍ക്കുന്നതായി അയല്‍വാസികളാണ് പോലീസിനെ അറിയിച്ചത്. പശുവിന്‍റെ ദുരവസ്ഥ അറിഞ്ഞ കോയിപ്രം എസ്എച്ച്ഒ കെ.എസ്. ഗോപകുമാറും സേനാംഗങ്ങളും മാരാമണ്ണില്‍ നിന്നും പശുവിനെ കോയിപ്രം സ്റ്റേഷനില്‍ കൊണ്ടുവന്ന് സംരക്ഷിക്കുകയാണ്.
വൈക്കോലും പുല്ലും വെള്ളവും ഉള്‍പ്പെടെ ആഹാരം ലഭിച്ചതിനെ തുടര്‍ന്ന് പശുവിന്‍റെ ദയനീയാവസ്ഥ മാറിയിരിക്കുകയാണ്. മോഷ്ടിച്ചതിന് ശേഷം പശുവിനെ ആരെങ്കിലും ഉപേക്ഷിച്ചതാണോയെന്ന് സംശയിക്കുന്നതായും പോലീസ് പറഞ്ഞു. ഉടമസ്ഥരെത്തുകയാണെങ്കില്‍ പശുവിനെ വിട്ടുകൊടുക്കാനും തയാറാണ്.
