കോട്ടയം: വിദൂര പഠനംവഴി ഉന്നതബിരുദം നേടാമെന്നു വിശ്വസിപ്പിച്ച് സാധാരണക്കാരിൽനിന്നും ലക്ഷങ്ങൾ തട്ടിയെടുത്ത ഓൾ ഇന്ത്യ ഡിസ്റ്റൻസ് എഡ്യുക്കേഷൻ (എയ്ഡ് ഇൻസ്റ്റിറ്റ്യൂഷൻ) മാനേജിംഗ് ഡയറക്ടർമാർ അറസ്റ്റിൽ.
മാസങ്ങളായി ഒളിവിൽ കഴിഞ്ഞിരുന്ന പ്രതികളെ വെസ്റ്റ് പോലീസാണു പിടികൂടിയത്. മലപ്പുറം കോട്ടൂർ മങ്ങാട്ടുപുലം പൂവല്ലൂർ ഷരീഫ് (32), വെസ്റ്റ് കോട്ടൂർ പിച്ചൻ കുന്നശേരി അബ്ദുൾ ആഷിഫ് (32) എന്നിവരെയാണ് അറസ്റ്റു ചെയ്തത്.
കോട്ടയം നഗരമധ്യത്തിൽ സ്റ്റാർ ജംഗ്ഷൻ കേന്ദ്രീകരിച്ച് ഓൾ ഇന്ത്യ ഡിസ്റ്റൻസ് എഡ്യുക്കേഷൻ എന്ന പേരിൽ സ്ഥാപനം നടത്തുകയായിരുന്നു പ്രതികൾ.
തമിഴ്നാട്ടിലെ മധുര കാമരാജ് സർവകലാശാല അടക്കം വിവിധ സർവകലാശാലകളുടെ ഡിഗ്രി കോഴ്സുകൾ ഹ്രസ്വകാലയളവിൽ പാസാക്കി സർട്ടിഫിക്കറ്റുകൾ നൽകുമെന്നു പറഞ്ഞാണ് ഇവർ വിദ്യാർഥികളെ ആകർഷിച്ചിരുന്നത്.
മധുര കാമരാജ് യൂണിവേഴ്സിറ്റിയുടെ മൂന്നു വർഷ ബിബിഎ സർട്ടിഫിക്കറ്റ് ആറുമാസം കൊണ്ടു നൽകാമെന്നു വിശ്വസിപ്പിച്ച് കൊല്ലം സ്വദേശിയായ യുവാവിൽനിന്നും 33000 രൂപ ഫീസായി വാങ്ങിയ ശേഷം, ഇതേ സർവകലാശാലയിൽ രജിസ്റ്റർ ചെയ്ത മറ്റൊരു വിദ്യാർഥിയുടെ ഹാൾടിക്കറ്റ് നന്പർ വ്യാജമായി നൽകിയാണു പ്രതികൾ തട്ടിപ്പ് നടത്തിയത്.
ഇത്തരത്തിൽ തട്ടിപ്പിന് ഇരയായ വിദ്യാർഥി അന്വേഷിച്ചപ്പോഴാണ് സർവകലാശാലയിൽ ഇയാളുടെ പേര് പോലും രജിസ്റ്റർ ചെയ്തിട്ടില്ലെന്നു കണ്ടെത്തിയത്.
വെസ്റ്റ് പോലീസ് കേസ് രജിസ്റ്റർ ചെയ്തതോടെ പ്രതികൾ മുൻകൂർ ജാമ്യവുമായി കോടതിയെ സമീപിച്ചു. ജാമ്യാപേക്ഷ തള്ളിയ കോടതി നടത്തിയ പ്രാഥമിക അന്വേഷണത്തിൽ ഇവരുടെ ഇൻസ്റ്റിറ്റ്യൂഷനു മധുര കാമരാജ് സർവകലാശാലയുടെ രജിസ്ട്രേഷൻ ഇല്ലെന്നു കണ്ടെത്തി. പ്രതികൾ ഹൈക്കോടതിയെ സമീപിച്ചു ജാമ്യം നേടുകയായിരുന്നു.
ഹൈക്കോടതി വിധിയുടെ അടിസ്ഥാനത്തിൽ സ്റ്റേഷനിലെത്തിയ പ്രതികളെ അറസ്റ്റു ചെയ്യുകയായിരുന്നു. കോടതി നിർദേശത്തിന്‍റെ അടിസ്ഥാനത്തിൽ പ്രതികളെ പിന്നീട് ജാമ്യത്തിൽ വിട്ടു.
സംസ്ഥാനത്തെന്പാടും ശാഖകളുള്ള സ്ഥാപനത്തിന്‍റെ വ്യാജ സർട്ടിഫിക്കറ്റുകൾ പലർക്കും ലഭിച്ചിട്ടുണ്ടെന്നു സംശയിക്കുന്നതായി പോലീസ് പറഞ്ഞു.
ഈ സ്ഥാപനത്തിൽ പഠിച്ചവർ സർട്ടിഫിക്കറ്റുകൾ പരിശോധനയ്ക്കു വിധേയമാക്കണമെന്നും പോലീസ് അറിയിച്ചു.
