കോട്ടയം: ചേംബറിൽ ഇരിക്കെ വനിതാ ജഡ്ജിക്കു നേരെ അശ്ലീല പരാമർശം നടത്തിയ വക്കീൽ ഗുമസ്തനെതിരെ കേസ്. കോട്ടയം അയർക്കുന്നം സ്വദേശി അനീഷിനെതിരേയാണ് ഏറ്റുമാനൂർ പോലീസ് കേസ് എടുത്തിരിക്കുന്നത്.
ജില്ലാ പോലീസ് മേധാവി ജി. ജയദേവിനു ജഡ്ജി നൽകിയ പരാതിയുടെ അടിസ്ഥാനത്തിലാണു നടപടി. അനീഷ് ഏറ്റുമാനൂർ കോടതിയിലെ വക്കീൽ ഗുമസ്തനാണ്.
കേസ് നടക്കുന്നതിടെ ഇയാൾ കോടതിയിൽ ഇരുന്ന മറ്റൊരാളെ കൈകൊട്ടി വിളിച്ചു. ഇതു ശ്രദ്ധയിൽപ്പെട്ട ജഡ്ജിയുടെ സമീപമുണ്ടായിരുന്ന പോലീസുകാരൻ ഇയാളോടു ശബ്ദമുണ്ടാക്കരുതെന്നു പറഞ്ഞു.
ഇനിയും ശബ്ദമുണ്ടാക്കിയാൽ ജഡ്ജി താങ്കളെ ചേംബറിലേക്കു വിളിപ്പിക്കുമെന്നും അറിയിച്ചു. ഇതിനു അശ്ലീല ചുവയോടെയാണ് ഇയാൾ മറുപടി പറഞ്ഞത്.
ഇതു കേൾക്കാനിടയായ ജഡ്ജി ജില്ലാ പോലീസ് മേധാവിക്കു പരാതി നൽകുകയായിരുന്നു. പ്രതി അനീഷ് ഇപ്പോൾ ഒളിവിലാണ്.
