കുമരകം: വിവാഹച്ചടങ്ങിൽ പങ്കെടുക്കാൻ കാറിലെത്തിയ നാലംഗസംഘം ബൈക്കു യാത്രക്കാരനെ ഇടിച്ചു വീഴ്ത്തി കടന്നുകളഞ്ഞു.
കുമരകം സ്വദേശിയായ ബൈക്ക് യാത്രക്കാരൻ വിനുവിനെയാണു കാറിടിച്ചത്. ഇടിപ്പിച്ച കാർ കുമരകം പോലീസ് കസ്റ്റഡിയിലെടുത്തു.
കുമരകം പെട്രോൾ പന്പിനു സമീപത്തും പുതിയകാവ് ക്ഷേത്രത്തിനു സമീപത്തുമാണ് യുവാവിന്‍റെ ബൈക്കിൽ കാറിടിപ്പിച്ചത്. യുവാവിന്‍റെ കാലിനും തലയ്ക്കും പരുക്കേറ്റിട്ടുണ്ട്. ബൈക്കിനും കേടുപാടുകളുണ്ട്.
പെട്രോൾ പന്പിനുസമീപം അശ്രദ്ധയോടെ കാർ ഓടിച്ച് ഇടിപ്പിച്ചതു പിന്നാലെ എത്തി ചോദ്യം ചെയ്തതിനാണു പുതിയകാവിനുസമീപം വീണ്ടും ഇടിപ്പിച്ചത്.
തുടർന്ന് ആശാരിച്ചേരി ഭാഗത്ത് നടത്തിയ വിവാഹചടങ്ങിൽ പങ്കെടുക്കുന്നതിനിടയിൽ പോലീസെത്തിയെങ്കിലും കാർ ഡ്രൈവറെ കണ്ടെത്താനായില്ല. വിനുവിനെ കുമരകം സാമുഹികാരോഗ്യ കേന്ദ്രത്തിൽ പ്രവേശിപ്പിച്ചു.
കാർ ഉടമയെ ഇന്നു സ്റ്റേഷനിൽ എത്തിച്ചു തുടർനടപടികൾ സ്വീകരിക്കുമെന്നു കുമരകം എസ്ഐ എസ്. സുരേഷ് പറഞ്ഞു. എന്നാൽ, കാർ ഡ്രൈവർ മദ്യലഹരിയിലായിരുന്നെന്നും ഇയാൾ പോലീസ് ഉദ്യോഗസ്ഥനാണെന്നും നാട്ടുകാർ പറയുന്നു.
