വിഴിഞ്ഞം: രാത്രിയിൽ വീടുകളിൽ കയറി കോഴിയെ മോഷ്ടിച്ച് കറിവച്ചു തിന്നുന്ന നാലംഗ സംഘത്തെ പോലീസ് പിടികൂടി. പ്രദേശത്തെ കോഴിക്കടയിൽ മോഷണത്തിന് ശ്രമിക്കുന്നതിനിടെയാണ് നാട്ടുകാരുടെ സഹായത്തോടെ പോലീസ് ഇവരെ പിടികൂടിയത്. ഉച്ചക്കട പയറ്റു വിള സ്വദേശികളായ വിജയൻ (56), ഷിബു (33), രാജീവ് കുമാർ (34), ഷിബു (37) എന്നിവരെയാണ് വിഴിഞ്ഞം പോലീസ് പിടികൂടിയത്. വിഴിഞ്ഞം ,ഉച്ചക്കട എന്നിവിടങ്ങൾ കേന്ദ്രികരിച്ചാണ് ഇവർ മോഷണം നടത്തിയിരുന്നത്.
കഴിഞ്ഞ ദിവസം രാത്രിയിൽ ഓട്ടോയിലെത്തിയ സംഘം ഉച്ചക്കടയിലെ ചിക്കൻ സ്റ്റാളിൽ മോഷണം നടത്താനെത്തി.
ശബ്ദം കേട്ട് നാട്ടുകാർ എത്തിയതോടെ ഓട്ടോ ഉപേക്ഷിച്ച് ഓടി രക്ഷപ്പെടാൻ ശ്രമിച്ച സംഘത്തിലെ ഒരാളെ നാട്ടുകാർ പിടികൂടി. രക്ഷപ്പെട്ട മറ്റുള്ളവരെ ഇന്നലെ വീടുകളിൽ നിന്ന് പോലീസ് അറസ്റ്റ് ചെയ്തു.കോഴികളെ കാണാതായ നിരവധി പേർ പരാതിയുമായെത്തിയിട്ടുണ്ടെന്ന് വിഴിഞ്ഞം എസ്ഐ പറഞ്ഞു.
