കോഴിക്കോട്: കോഴിക്കോട് മെഡിക്കൽ കോളജിൽ വീണ്ടും ശസ്ത്രക്രിയ പിഴവെന്ന് പരാതി. കോഴിക്കോട് പയ്യാനയ്ക്ക‌ല്‍ സ്വദേശി അജിത്താണ് പരാതിക്കാരന്‍. അപകടത്തിൽ പരിക്കേറ്റ യുവാവ് ശസ്ത്രക്രിയയ്ക്ക് വിധേയനായപ്പോഴാണ് പിഴവ് സംഭവിച്ചത് മനസിലായത്.
കഴിഞ്ഞ ദിവസം ഉണ്ടായ അപകടത്തിൽ അജിത്തിന്‍റെ കൈയിലെ എല്ലു പൊട്ടി. ഉടൻതന്നെ യുവാവിന് ശസ്ത്രക്രിയയ്ക്ക് വിധേയനാകേണ്ടി വന്നു. എന്നാൽ യുവാവിന്‍റെ കൈയിൽ ഇട്ടത് കാലിന് ഇടേണ്ട വലിയ കമ്പിയാണ്.
ശസ്ത്രക്രിയയ്ക്കു ശേഷം അജിത്തിന് വേദന ശക്തമായപ്പോഴാണ് ശസ്ത്രക്രിയയിലെ പിഴവ് തിരിച്ചറിഞ്ഞത്. അതിനു പിന്നാലെ വീണ്ടും ശസ്ത്രക്രിയ നടത്തണമെന്ന് ആശുപത്രി അധികൃതർ ആവശ്യപ്പെട്ടെന്ന് അജിത്തിന്‍റെ കുടുംബം ആരോപിച്ചു. 3000 രൂപയുടെ ശസ്ത്രക്രിയ ഉപകരണങ്ങള്‍ തങ്ങള്‍ വാങ്ങി കൊടുത്തിരുന്നു എന്നും, പക്ഷേ അതൊന്നും ഡോക്ടര്‍ ഉപയോഗിച്ചിട്ടില്ലെന്നും യുവാവിന്‍റെ അമ്മ പറഞ്ഞു.
