കോഴിക്കോട്: കോഴിക്കോട് ഗവ. മെഡിക്കല്‍ കോളജ് ആശുപത്രിയില്‍ അവയവംമാറി ശസ്ത്രക്രിയ നടത്തിയ സംഭവത്തില്‍ ഡോക്‌ടറെ വിചാരണ ചെയ്യാന്‍ സര്‍ക്കാര്‍ അനുമതി. കോഴിക്കോട് മെഡിക്കല്‍ കോളജ് മാതൃ-ശിശു സംരക്ഷണ കേന്ദ്രം പീഡിയാട്രിക് സര്‍ജറി വിഭാഗത്തിലെ അഡീഷണല്‍ പ്രഫസര്‍ ഡോ. ബിജോണ്‍ ജോണ്‍സനെ വിചാരണ ചെയ്യാനാണ് അനുമതി.
കോഴിക്കോട് മെഡിക്കല്‍ കോളജ് പോലീസ് രജിസ്റ്റര്‍ ചെയ്ത കേസിലെ പ്രതിയാണ് ഡോ. ബിജോണ്‍ ജോണ്‍സന്‍. ശസ്ത്രക്രിയാ വിവാദത്തില്‍ പോലീസിന്‍റെ റിപ്പോര്‍ട്ടും ആരോഗ്യവകുപ്പുതല അന്വേഷണത്തിന്‍റെ റിപ്പോര്‍ട്ടും പരിഗണിച്ച് സിആര്‍പിസി സെക്ഷന്‍ 197 പ്രകാരമാണ് ഡോക്‌ടറെ വിചാരണ ചെയ്യാന്‍ അനുമതി നല്‍കിയത്.
കോഴിക്കോട് ചെറുവണ്ണൂര്‍ മധുരവനം സ്വദേശിയായ നാലു വയസുകാരിക്കു കഴിഞ്ഞ വര്‍ഷം മേയ് 16നാണ് മെഡിക്കല്‍ കോളജ് മാതൃശിശു സംരക്ഷണകേന്ദ്രത്തില്‍ ശസ്ത്രക്രിയ നടത്തിയത്. കുഞ്ഞിന്‍റെ കൈയിലെ ആറാം വിരലിനു ശസ്ത്രക്രിയ നടത്താനാണ് ആശുപത്രിയില്‍ എത്തിയത്.
ഓപ്പറേഷന്‍ തിയറ്ററില്‍നിന്നു വാര്‍ഡിലേക്കു മാറ്റിയപ്പോള്‍ കുട്ടിയുടെ വായില്‍ പഞ്ഞി കണ്ട് വീട്ടുകാര്‍ വിവരം തിരക്കിയപ്പോഴാണ് ഡോക‌്‌ടർ‍ക്കു സംഭവിച്ച പിഴവ് വ്യക്തമായത്. ആറാംവിരല്‍ അതേസ്ഥാനത്ത് ഉണ്ടായിരുന്നു. സംഭവം വിവാദമായതോടെ പിന്നീടു കൈവിരലിനും ശസ്ത്രക്രിയ നടത്തി. വീഴ്ച വ്യക്തമായതോടെ ഡോക്‌ടറെ ആരോഗ്യവകുപ്പ് സസ്‌പെന്‍ഡ് ചെയ്തു.
കുഞ്ഞിന്‍റെ നാവിലെ കെട്ട് (ടംഗ് ടൈ) പരിഹരിക്കാനാണു ശസ്ത്രക്രിയ നടത്തിയതെന്നാണു ഡോക്ടർ വിശദീകരിച്ചത്. പക്ഷേ രക്ഷിതാക്കളെ ഈ വിവരം അറിയിച്ചിരുന്നില്ല. സംഭവത്തില്‍ ഡോക്ടർ മാപ്പു പറയുകയും ചെയ്തിരുന്നു.
