കിഴക്കമ്പലം: കിഴക്കമ്പലം പഞ്ചായത്തിലെ പഴങ്ങനാട് എട്ടോടി പാടശേഖരത്തിലേക്ക് സാമൂഹ്യവിരുദ്ധര്‍ വെള്ളം തുറന്നുവിട്ടതായി പാടശേഖര സമിതി പോലീസില്‍ പരാതി നല്കി. കൊയ്ത്തിനു മുമ്പായി പാടത്തെ വെള്ളം മോട്ടോര്‍ പമ്പ് ഉപയോഗിച്ച് ഒരാഴ്ച മുമ്പ് വറ്റിച്ചിരുന്നു.
ഇവിടേക്ക് കഴിഞ്ഞ രാത്രി സാമൂഹ്യവിരുദ്ധര്‍ സമീപത്തെ പാലക്കുഴി തോടിന്റെ ബണ്ട് പൊളിച്ച് വെള്ളം കയറ്റിയെന്നാണ് പാടശേഖര സമിതി തടയിട്ടപറമ്പ് പോലീസിനു പരാതി നല്കിയിരിക്കുന്നത്.വെള്ളം കയറിയതിനാല്‍ കൊയ്ത്ത് മെതിയന്ത്രം ഉപയോഗിച്ചുള്ള വിളവെടുപ്പ് പ്രതിസന്ധിയിലായെന്ന് കര്‍ഷകര്‍ പറഞ്ഞു. പാടശേഖരസമിതി പ്രസിഡന്റ് വി.ജെ. വര്‍ഗീസ്, സെക്രട്ടറി പി.സി. വര്‍ഗീസ് എന്നിവര്‍ പഞ്ചായത്തിലും പരാതി നല്‍കിയിട്ടുണ്ട്.
