കെ.ഷിന്‍റുലാല്‍
കോഴിക്കോട് : ഡിസിസി അധ്യക്ഷന്‍മാരുടെ പട്ടികയെക്കുറിച്ചും കെപിസിസി നേതൃത്വത്തെക്കുറിച്ചും അപകീര്‍ത്തിപരമായ പരസ്യപ്രതികരണങ്ങള്‍ക്കു കൂച്ചുവിലങ്ങിട്ട ഹൈക്കമാന്‍ഡ് നിര്‍ദേശത്തിനു പിന്നാലെ സമൂഹമാധ്യമങ്ങളില്‍ ‘കെ.എസ് ബ്രിഗേഡ്’ നിരീക്ഷണം ശക്തമാക്കി.
ഇതു തിരിച്ചറിഞ്ഞ് തത്കാലം ബ്രേക്ക് ദ ചെയിന്‍ നടപ്പാക്കാന്‍ എ, ഐ അണികള്‍ക്കു നിര്‍ദേശം. തെരഞ്ഞെടുക്കപ്പെട്ട ഡിസിസി പ്രസിഡന്‍റുമാരെക്കുറിച്ചു മോശമായ പരാമര്‍ശങ്ങള്‍ പൊതുഇടങ്ങളില്‍ വേണ്ടെന്നും പാര്‍ട്ടിക്കുള്ളില്‍ ചര്‍ച്ച ചെയ്തു പ്രതിഷേധങ്ങളുണ്ടെങ്കില്‍ അക്കാര്യം ബന്ധപ്പെട്ടവര്‍ നേതൃത്വത്തെ അറിയിക്കുമെന്നും എ, ഐ ഗ്രൂപ്പ് നേതാക്കള്‍ കെപിസിസി ഭാരവാഹികള്‍ക്കും ജില്ലാ ഭാരവാഹികള്‍ക്കും നിര്‍ദേശം നല്‍കി.
പരസ്യപ്രതികരണം നടത്തുന്നവര്‍ക്കു ഭാവിയില്‍ സ്ഥാനങ്ങള്‍ നല്‍കാന്‍ കോണ്‍ഗ്രസ് ഹൈക്കമാന്‍ഡ് തയാറാകില്ലെന്ന നിലപാട് പുറത്തു വന്നതിനു പിന്നാലെയാണ് സ്വയം നിയന്ത്രിക്കാന്‍ നേതാക്കള്‍ക്കു നിര്‍ദേശം ലഭിച്ചത്.
ഡിസിസി അധ്യക്ഷന്‍മാരുടെ പ്രഖ്യാപനത്തിനു പിന്നാലെ കെപിസിസി ഭാരവാഹികളെയും ഉടന്‍ നിശ്ചയിക്കാനിരിക്കെയാണ് ഗ്രൂപ്പ് നേതാക്കള്‍ അച്ചടക്കം പാലിക്കാന്‍ നിര്‍ദേശം നല്‍കിയത്.
നിരീക്ഷണത്തിന് കെഎസ് ബ്രിഗേഡ്
സമൂഹമാധ്യമങ്ങളില്‍ കെ.സുധാകരനെതിരേയും വി.ഡി.സതീശനെതിരേയും പരസ്യമായി പ്രതികരിക്കുന്നവരെ കണ്ടെത്താന്‍ “കെഎസ് ബ്രിഗേഡ്’ രംഗത്തുണ്ട്.
മാധ്യമങ്ങളില്‍ വരുന്ന പ്രസ്താവനകളും മറ്റും വിശദമായി പരിശോധിക്കുകയും സമൂഹമാധ്യമങ്ങളിലെ പോസ്റ്റുകളും ഷെയറുകളുമെല്ലാം നിരീക്ഷിക്കുകയും ചെയ്യുന്നതിനു സൈബര്‍ വിഭാഗത്തെ ഒരുക്കി.
കെപിസിസി ഭാരവാഹികള്‍, ജില്ലാ കോണ്‍ഗ്രസ് ഭാരവാഹികള്‍ , മഹിളാ കോണ്‍ഗ്രസ്, യൂത്ത്‌കോണ്‍ഗ്രസ് നേതാക്കള്‍ എന്നിങ്ങനെ പ്രത്യേക വിഭാഗങ്ങളാക്കി പ്രവര്‍ത്തകരുടെ പട്ടിക തയാറാക്കുകയും ഇവരില്‍ സമൂഹമാധ്യമങ്ങളില്‍ സജീവ പങ്കാളികളാവുന്നവരെ നിരീക്ഷിക്കുകയുമാണ് ചെയ്തുവരുന്നത്.
ഡിസിസി പ്രസിഡന്‍റ് പ്രഖ്യാപനത്തിനു ശേഷമുള്ള പോസ്റ്റുകളും ഷെയറുകളുമാണ് പരിശോധിക്കുന്നത്.മുമ്പ് എ, ഐ ഗ്രൂപ്പുകളില്‍ സജീവമായുണ്ടായിരുന്നവരില്‍ പലരും ഇപ്പോള്‍ സുധാകരനൊപ്പമാണുള്ളത്.
സഹപ്രവര്‍ത്തകരായിരുന്നവരെ കേന്ദ്രീകരിച്ചുള്ള ഇവരുടെ രഹസ്യനിരീക്ഷണവും കെ.എസ് ആര്‍മിക്കു സഹായകമാണ്. എ ഗ്രൂപ്പ് നേതാവായിരുന്ന ടി.സിദ്ദീഖിന്‍റെ പിന്തുണയോടെയാണ് കോഴിക്കോട് കെ.പ്രവീണ്‍കുമാര്‍ പ്രസിഡന്‍റായത്.
സിദ്ദീഖിനൊപ്പമുള്ളവര്‍ ഇപ്പോള്‍ സുധാകരനെ അനുകൂലിച്ചാണ് പ്രവര്‍ത്തിക്കുന്നത്. എന്നാല്‍, കെപിസിസി വാക്താവ് കെ.സി.അബുവിന്‍റെ നേതൃത്വത്തിലുള്ള എഗ്രൂപ്പുകാര്‍ ഇപ്പോഴത്തെ നിയമനത്തില്‍ അതൃപ്തിയിലാണ്. ഇവരാരും തന്നെ സമൂഹമാധ്യമങ്ങളിലൂടെയും മറ്റും അമര്‍ഷം പരസ്യപ്പെടുത്തിയിട്ടില്ല.
ഇടം പിടിക്കാന്‍
കെപിസിസി ഭാരവാഹികളെ നിശ്ചയിക്കുകയെന്നതാണ് കോണ്‍ഗ്രസ് നേതൃത്വത്തിനു മുന്നിലുള്ള പുതിയ കടമ്പ. ഗ്രൂപ്പുകള്‍ക്കതീതമായാണ് പുതിയ പ്രഖ്യാപനവും നടക്കുകയെന്ന സൂചനയാണിപ്പോള്‍ പുറത്തുവരുന്നത്.
അതിനാല്‍ ഇനിയുള്ള ദിവസങ്ങളില്‍ ഗ്രൂപ്പ് മേധാവിത്തം വിട്ടു സജീവമാകാനുള്ള ഒരുക്കങ്ങള്‍ പ്രവര്‍ത്തകരും ആരംഭിച്ചു. കെപിസിസിയുടെ ജനറല്‍ സെക്രട്ടറിമാരെയും സെക്രട്ടറിമാരെയുമാണ് അടുത്ത ഘട്ടത്തില്‍ നിശ്ചയിക്കാനുള്ളത്.
കൂടാതെ ഡിസിസി അധ്യക്ഷന് പുറമേ മറ്റു ഭാരവാഹികളെ കൂടി തീരുമാനിക്കാനുണ്ട്.
സമ്മര്‍ദം എ, ഐ ഗ്രൂപ്പ്
പുതിയ ഭാരവാഹി പട്ടിക തയാറാക്കുമ്പോള്‍ പരിഗണന ലഭിക്കുന്നതിനായി സമ്മര്‍ദം ശക്തമാക്കാനും എ, ഐ ഗ്രൂപ്പ് നേതാക്കള്‍ നീക്കം നടത്തുന്നുണ്ട്.
ഇരുഗ്രൂപ്പുകളും ഒറ്റക്കെട്ടായി നില്‍ക്കാനാണ് തീരുമാനിച്ചത്. അനുചിതമായ പട്ടികയാണ് തയാറാക്കുന്നതെങ്കില്‍ ഒറ്റക്കെട്ടായി എതിര്‍ക്കും. പരസ്യ പ്രതികരണത്തിനു വിലക്കുള്ളപ്പോഴും മുതിര്‍ന്ന നേതാക്കള്‍ ഒരുപോലെ രംഗത്തെത്തിയത് സുധാകരനുള്‍പ്പെടെയുള്ളവര്‍ക്കു കെപിസിസി ഭാരവാഹികളെ നിശ്ചയിക്കുന്നതിന് മുന്നോടിയായുള്ള താക്കീതുമായാണ്.
അതേസമയം, ഹൈക്കമാന്‍ഡിന്‍റെ പിന്‍ബലം കൂടി ലഭിച്ചതോടെ പുതിയ പട്ടികയും വിട്ടുവീഴ്ചയില്ലാതെ തയാറാക്കാനുള്ള നീക്കത്തിലാണ് നേതൃത്വം.
