ഇടുക്കി: പാബ്ലയ്ക്ക് സമീപം കെഎസ്ആര്‍ടിസി ബസ് നിയന്ത്രണം വിട്ട് മതിലില്‍ ഇടിച്ചു. പത്തു പേര്‍ക്ക് പരിക്കേറ്റു. നേര്യമംഗലം -പൈനാവ് റോഡില്‍ പാംബ്ല കെഎസ്ഇബി കോളനി ഭാഗത്ത് ഇന്നു പുലര്‍ച്ചെ 1.15 ഓടെയാണ് അപകടം.
എറണാകുളത്തു നിന്നും നെടുങ്കണ്ടത്തേക്കു പോവുകയായിരുന്ന കെഎസ്ആര്‍ടിസി ബസാണ് അപകടത്തില്‍പ്പെട്ടത്. പരിക്കേറ്റ ആറു പേരെ ഇടുക്കി മെഡിക്കല്‍ കോളജിലും നാലു പേരെ അടിമാലിയിലെ സ്വകാര്യ ആശുപത്രിയിലും പ്രവേശിപ്പിച്ചു.
ആരുടെയും പരിക്ക് ഗുരുതരമല്ലെന്ന് പോലീസ് പറഞ്ഞു. ഏതാനും ദിവസം മുമ്പ് അടിമാലി -നേര്യമംഗലം റോഡില്‍ വാളറയ്ക്കു സമീപം കെഎസ്ആര്‍ടിസി ബസ് അപകടത്തില്‍പ്പെട്ട് യാത്രക്കാര്‍ക്ക് പരിക്കേറ്റിരുന്നു.
