കൊച്ചി: ഇടപ്പള്ളിയില്‍ വാഹനങ്ങളുടെ കൂട്ടയിടി. ബ്രേക്ക് നഷ്ടപ്പെട്ട കെഎസ്ആര്‍ടിസി ബസ് വാനിലും ടെന്പോയിലും ബൈക്കിലും ഇടിച്ച് 35 പേര്‍ക്ക് പരിക്ക്. ആരുടെയും പരിക്ക് ഗുരുതരമല്ല.
കെഎസ്ആര്‍ടിസി ബസിലുണ്ടായിരുന്ന 20 പേര്‍ക്കും അയ്യപ്പഭക്തരില്‍ 12 പേര്‍ക്കും വാനിലുണ്ടായിരുന്ന രണ്ടു പേര്‍ക്കും ഒരു ബൈക്ക് യാത്രികനുമാണ് നിസാര പരിക്കേറ്റത്. ഇവർക്ക് ഇടപ്പള്ളിയിലെ സ്വകാര്യ ആശുപത്രിയില്‍ പ്രഥമ ശുശ്രൂഷ നല്‍കി.
ഇടപ്പള്ളി ജംഗ്ഷനില്‍ ഇന്നു രാവിലെ എട്ടിനായിരുന്നു അപകടം. ബ്രേക്ക് നഷ്ടപ്പെട്ടതിനെ തുടര്‍ന്നു കെഎസ്ആര്‍ടിസി ബസ് ആദ്യം മിനി ലോറിയിലാണ് ഇടിച്ചത്. മിനിലോറി ശബരിമല തീര്‍ഥാടകരുടെ വാഹനത്തില്‍ ചെന്ന് ഇടിക്കുകയായിരുന്നു. ഈ വാഹനം മുന്നോട്ടു ചെന്ന് മറ്റൊരു ബൈക്കിലും ഇടിച്ചു.
വലിയ അപകടമാണ് തലനാരിഴയ്ക്ക് ഒഴിവായത്. അയ്യപ്പഭക്തര്‍ ആന്ധ്രയില്‍ നിന്നുള്ളവരാണ്. കെഎസ്ആര്‍ടിസി ബസ് എറണാകുളം ഡിപ്പോയിലേക്ക് പോകുകയായിരുന്നു.
