ചാത്തന്നൂർ: അസോസിയേഷൻ ഓഫ് സ്റ്റേറ്റ് റോഡ് ട്രാൻസ്പോർട്ട് അണ്ടർടേക്കിംഗ്സ് (എഎസ്ആർടിയു ) ഏർപ്പെടുത്തിയിട്ടുള്ള ദേശീയ പൊതു ബസ് ഗതാഗത മികവ് അവാർഡ് കെഎസ്ആർടിസിക്ക് ലഭിച്ചു. പൊതു ഗതാഗതത്തിൻ്റെ ആവശ്യകതയുടെ പഠനം എന്ന പദ്ധതിക്കും കൂടാതെ ഈ കാലയളവിൽ വിജയകരമായി നടപ്പിലാക്കിയ വിവിധ പദ്ധതികൾക്കുമായാണ് അംഗീകാരം.
പ്രത്യേക ജൂറി അവാർഡ്നേടിയതോടൊപ്പം കെഎസ്ആർടിസിക്ക് ഒരു ലക്ഷം രൂപയുടെ പാരിതോഷികവും ലഭിച്ചു.ന്യൂഡൽഹിയിലെ ഇന്ത്യ ഹാബിറ്റാറ്റ് സെന്ററിലെ ജാക്കറാൻഡ ഹാളിൽ നടന്ന ചടങ്ങിൽ പുതുച്ചേരി മുൻ ലെഫ്റ്റനന്‍റ് ഗവർണർ കിരൺ ബേഡി അവാർഡ് സമ്മാനിച്ചു.
കെഎസ്ആർടിസി ചെയർമാനും മാനേജിംഗ് ഡയറക്ടറുമായ പ്രമോജ് ശങ്കർ പുരസ്കാരം ഏറ്റുവാങ്ങി. ചടങ്ങിൽ എ എസ് ആർ ടിയു വൈസ് ചെയർമാൻ ദ്വാരക തിരുമല റാവുഐപിഎസ്, എക്സിക്യൂട്ടീവ് ഡയറക്ടർ ടി. സൂര്യകിരൺ എന്നിവരും രാജ്യത്തെ വിവിധ സംസ്ഥാനങ്ങളിലെ റോഡ് ട്രാൻസ്പോർട്ട് അണ്ടർടേക്കിംഗുകളുടെ ഉന്നത ഉദ്യോഗസ്ഥരും പങ്കെടുത്തു.
പൊതു ഗതാഗത സംവിധാനം ശക്തിപ്പെടുത്തുന്നതിനായി നടപ്പിലാക്കിയ നവീകരണ പ്രവർത്തനങ്ങളും സർവീസ് ഓപ്പറേഷൻ, അഡ്മിനിസ്ട്രേഷൻ, മെയിൻ്റനൻസ്മേഖലകളിൽ നടപ്പിലാക്കിയ ഗുണപരമായ പരിഷ്ക്കാരങ്ങൾ, പൊതു ഗതാഗതത്തിലെ ആവശ്യകതയുടെ പഠനത്തിൽ നിന്ന് ലഭിച്ച നിർദേശങ്ങൾ, നവീന ആശയങ്ങളിലൂടെ കെഎസ്ആർടിസിയുടെ പ്രവർത്തന നഷ്ടം കുറയ്ക്കുന്നതിനുള്ള പരിഷ്കാരങ്ങൾ എന്നിവയാണ് ഈ അംഗീകാരത്തിന് അടിസ്ഥാനമായത്.
