ചാത്തന്നൂർ: കെഎസ്ആർടിസി കൂടുതൽ കുട്ടി ബസുകൾ നിരത്തിലിറക്കും. ഇതിന്‍റെ ട്രയൽ റൺ മന്ത്രി കെ.ബി. ഗണേശ്കുമാർ തിരുവനന്തപുരത്ത് നടത്തി. മലയോരമേഖലകളിലും ഉൾപ്രദേശങ്ങളിലും ചെറു നഗരങ്ങളിലും അനായസം സർവീസ് നടത്താൻ മിനി ബസുകൾക്ക് കഴിയുമെന്നതിനാലാണ് ഈ തീരുമാനം.
വലിയ ബസുകൾ ഉപയോഗിച്ച് സർവീസ് നടത്താൻ കഴിയാത്ത എന്നാൽ നിലവിൽ സർവീസ് നടത്തുന്ന റൂട്ടുകളിൽ മിനി ബസ് ഓടിക്കും.
ടാറ്റയുടെ എൽപി 712 സീരിസ് 120 ബസുകളാണ് വാങ്ങുന്നത്. 32സീറ്റുകളുള്ള 8, 63 മീറ്റർ നീളവും 2.3 മീറ്റർ വീതിയും 18 സി എം ഫ്ലോർ ഉയരവുമുള്ളതാണ് ഈ ബസുകൾ.
നോൺ എ സി ആണ് ഈ എൽ പി വാതക ഇന്ധന ബസുകൾ. ഡീസൽ ചിലവ് കുറയ്ക്കാനും ഇടുങ്ങിയ റോഡുകളിൽ സർവീസ് നടത്താനും ജനസാന്ദ്രത കുറഞ്ഞ മേഖലകളിലേയ്ക്ക് സർവീസ് വ്യാപിക്കാനും ലാസ്റ്റ് മൈൽ കണക്ടിവിറ്റി ഉറപ്പാക്കുന്നതിനും ഈ വാതക ഇന്ധന ബസുകൾ ഉപകരി ങ്ങുമെന്ന വിലയിരുത്തലാണ്.
കെ എസ് ആർടിസി വാങ്ങുന്ന മിനി ബസുകളിൽ പബ്ലിക് അഡ്രസിംഗ് സിസ്റ്റം, ഡാഷ് ബോർഡ് കാമറ, എൽ ഇ ഡി ടി വി വിത്ത് മ്യൂസിക്, പ്രായാധിക്യമുള്ളവർക്ക് കയറാനും ഇറങ്ങാനുമുള്ള സൗകര്യം എന്നിവയും സജ്ജീകരിക്കണമെന്ന് നിർദ്ദേശം നല്കിയിട്ടുണ്ട്. ഇത്തരം ബസുകൾ ഓർഡിനറിയായാണ് സർവീസ് നടത്തുന്നത്.
യാത്രക്കാർക്ക് നിന്നും യാത്ര ചെയ്യാം. ഗതാഗത മന്ത്രി ഇന്നലെ ട്രയൽ റൺ നടത്തിയ ബസ് മന്ത്രിയുടെ മണ്ഡലമായപത്തനാപുരത്തെ യൂണിറ്റിന് കൈമാറും. ഈ ബസ് പത്തനാപുരം -കുര-മൈലം -കൊട്ടാരക്കര റൂട്ടിൽ സർവീസ് നടത്തും.
പ്രദീപ് ചാത്തന്നൂർ
