കുമരകം: യുവാവിനെ തൂങ്ങി മരിച്ച നിലയിൽ കണ്ടെത്തി. അംബികാ മാർക്കറ്റിനു സമീപം മാന്പ്രയിൽ ഹേമാലയത്തിൽ പരേതനായ ഗിരീഷിന്‍റെ മകൻ ഗോപി വിജയി (19)യുടെ മൃതദേഹമാണ് ഇന്നലെ ചീപ്പുങ്കൽ പാലത്തിന് പടിഞ്ഞാറു ഭാഗത്ത് ഇറിഗേഷൻ വകുപ്പിന്‍റെ ചിറയിൽ ചീപ്പിന്‍റെ സമീപത്തെ മരത്തിൽ തൂങ്ങിയ നിലയിൽ കണ്ടെത്തിയത്.
ഒരു പെണ്‍കുട്ടിക്കൊപ്പം യുവാവ് രാവിലെ ഇവിടേക്ക് വരുന്നത് പലരും കണ്ടിരുന്നു. സമീപത്ത് ഒരു എഴുത്തും കുടയും ലേഡീസ് ബാഗും കണ്ടെത്തി.
കോട്ടയം വെസ്റ്റ് പോലീസ് സ്ഥലത്തെത്തി നടത്തിയ അന്വേഷണത്തിൽ ഈ പെണ്‍കുട്ടിയുടേതെന്നു കരുതുന്ന മൊബൈൽ ഫോണ് ബാഗിൽ നിന്നും കണ്ടെത്തി.
പിന്നീട് മാലിക്കായൽ ഭാഗത്തു നിന്നും ഒരു മാസ്കും കർച്ചീഫും കണ്ടെത്തി. ഇതു കാണാതായ പെണ്‍കുട്ടിയുടേതാണെന്ന് ബന്ധുക്കൾ സ്ഥിരീകരിച്ചു.
ഗോപിയുടെ നിർദേശം ധിക്കരിച്ച് പെൺകുട്ടി ബംഗളൂരുവിൽ നഴ്സിംഗ് പഠനത്തിനായി പോയതിൽ മനംനൊന്താണ് ഇയാൾ തൂങ്ങി മരിച്ചതെന്ന് സംശയിക്കുന്നതായി ബന്ധുക്കൾ പറഞ്ഞു.
തുടർന്ന് ഈ പ്രദേശത്ത് തെരച്ചിൽ നടത്തിയെങ്കിലും പെണ്‍കുട്ടിയെ കണ്ടെത്താനായില്ല. ഇവിടം നിറയെ കുറ്റിക്കാടും ചതുപ്പുനിലങ്ങളുമായതിനാൽ തെരച്ചിൽ ദുഷ്കരമാണ്.
വൈകുന്നേരത്തോടെ ഡോഗ് സ്ക്വാഡും എത്തിയിരുന്നു. പോലീസ് നായ് കവണാറ്റിൻകര പാലം വരെ ഓടിയെത്തി.
വെസ്റ്റ് എസ്എച്ച്ഒ അനൂപ് കൃഷ്ണ, എസ്ഐ ടി. ശ്രീജിത്ത് തുടങ്ങിയവരുടെ നേതൃത്വത്തിൽ നടത്തിയ തെരച്ചിൽ രാത്രി എട്ടോടെ അവസാനിപ്പിച്ചു.
ഇന്നു രാവിലെ തിരച്ചിൽ പുനരാരംഭിക്കും. സംസ്കാരം ഇന്ന് 11ന് വീട്ടുവളപ്പിൽ മാതാവ്: ആശ. സഹോദരി: ദേവു.
