ഗാന്ധിനഗർ: കുറവിലങ്ങാട് അപകടത്തിൽ അഞ്ചു പേർ മരിച്ചതറിഞ്ഞു മെഡിക്കൽ കോളജ് മോർച്ചറി പരിസരത്തേക്ക് ജനപ്രവാഹം. കോട്ടയം വേളൂർ ഉള്ളാട്ടിപ്പടിയിൽ തന്പി (68), ഭാര്യ വത്സല (65) ഇവരുടെ മകൻ പ്രവീണിന്‍റെ ഭാര്യ പ്രഭ (46) പ്രഭയുടെ മാതാവ് ഉഷ തോമസ് (62), പ്രഭയുടെ മകൻ അർജുൻ പ്രവീണ്‍ (19) എന്നിവരാണു മരിച്ചത്.
മോർച്ചറിയിൽ സൂക്ഷിച്ചിരിന്ന മൃതദേഹങ്ങൾ രാവിലെ എട്ടിനു പുറത്തെടുത്തു. കുറവിലങ്ങാട് പോലീസും 8.30നു പാലാ ഡിവൈഎസ്പി ഷാജിമോന്റെ നേതൃത്വത്തിൽ ഇൻക്വസ്റ്റ് നടപടി പൂർത്തികരിച്ച് ഉച്ചയോടെ മൃതദേഹം ബന്ധുക്കൾക്കു കൈമാറി.
തിരുവഞ്ചൂർ രാധാകൃഷ്ണൻ എംഎൽഎ, സിപിഎം ജില്ല സെക്രട്ടി വി.എൻ. വാസവൻ, കോട്ടയം നഗരസഭാ കൗണ്‍സിൽ അംഗം എം.പി. സന്തോഷ്കുമാർ എന്നിവർ സ്ഥലത്തെത്തി ആവശ്യമായ നിർദ്ദേശം നൽകുകയും ചെയ്തു.
