കൊച്ചി: പ്രളയം തൂത്തെറിഞ്ഞ കാർഷികമേഖലയെ തിരിച്ചുപിടിക്കാൻ പാടത്തേക്കിറങ്ങിയിരിക്കുകയാണു കുറുമശേരിയിലെ വനിതകൾ. കൃഷിപ്പണികളിൽ പരിജ്ഞാനമില്ലെങ്കിലും എല്ലാം പഠിക്കാൻ തയാറായാണ് ഇവരുടെ പുറപ്പാട്. തെങ്ങുകയറാൻ വരെ റെഡി. യന്ത്രങ്ങൾ തന്നു സഹായിച്ചാൽ തെങ്ങ് കയറുക മാത്രമല്ല ഞാറു നടാനും നെല്ല് കൊയ്യാനും ട്രാക്ടർ ഓടിക്കാനും ഇവർ തയാറാണ്.
സംസ്ഥാന സർക്കാർ പദ്ധതിയായ മഹിളാ കിസാൻ ശാക്തീകരണ്‍ പരിയോജന പ്രകാരം എല്ലാവരും പരിശീലനം തുടങ്ങിക്കഴിഞ്ഞു.അടിതെറ്റിയ കാർഷിക മേഖലയുടെ താളം വീണ്ടെടുക്കുന്നതിനൊപ്പം തൊഴിൽരഹിതരായ വനിതകൾക്കു വരുമാനമാർഗവും പദ്ധതിയുടെ ലക്ഷ്യമാണ്. തെങ്ങുകയറ്റ യന്ത്രം, ഞാറുനടീൽ യന്ത്രം, കൊയ്ത്തു യന്ത്രം, ട്രാക്ടർ എന്നിവ പരിശീലിപ്പിക്കുകയാണ് ആദ്യം. തുടർന്നു 10 പേരടങ്ങുന്ന സംഘങ്ങൾ രൂപീകരിക്കും.
സംഘങ്ങളുടെ നേതൃത്വത്തിലായിരിക്കും കൃഷിപ്പണികൾ ചെയ്യുക. ഇതിൽ 60 ശതമാനം തുക അംഗങ്ങൾക്കു കൂലിയായി ലഭിക്കും. 40 ശതമാനം യന്ത്രങ്ങളുടെ പ്രവർത്തനച്ചെലവിനും. പ്രളയ ബാധിത പഞ്ചായത്തുകളിൽ അമേരിക്കയിലെ മലയാളി വനിതകളുടെ കൂട്ടായ്മയായ ’പുണ്യം’ സംഘടന പച്ചക്കറിക്കൃഷി നടത്തുന്നതിനാവശ്യമായ ഫണ്ട് നൽകുന്നുണ്ട്. തദ്ദേശ സ്ഥാപനങ്ങളും സംസ്ഥാന സർക്കാർ നേരിട്ടും പണം നൽകുന്നു. ഏകദേശം ഒരു കോടി രൂപയാണു പദ്ധതിക്കായി ചെലവഴിക്കുന്നത്.
പാലക്കാട് ആസ്ഥാനമായ വുമണ്‍സ് വെസ്റ്റ് ഫെഡറേഷൻ ലേബർ ബാങ്ക് എന്ന കാർഷിക സംഘടനയാണു കുറുമശേരിയിൽ പരിശീലനം നൽകുന്നത്. നിലവിൽ 20 യുവതികൾ പരിശീലനം തേടുന്നു. ഇതു സംബന്ധിച്ചുള്ള ആദ്യ അറിയിപ്പിൽ തന്നെ പ്രതീക്ഷിച്ചതിനേക്കാൾ കൂടുതൽ സഹകരണമാണ് ലഭിച്ചതെന്നു ടീം ലീഡർ ഉഷ ബാബുരാജ് പറഞ്ഞു. പ്രളയത്തിൽ നശിച്ചതു മാത്രമല്ല തരിശു കിടക്കുന്ന മുഴുവൻ ഭൂമിയിലും കൃഷി ചെയ്യുമെന്നും ഉഷ പറയുന്നു.
പ്രദേശത്തെ വെള്ളക്ഷാമത്തിനു പരിഹാരം കാണാൻ പാറക്കടവ് സർവീസ് സഹകരണ ബാങ്ക് സഹായങ്ങൾ വാഗ്ദാനം ചെയ്തിട്ടുണ്ട്. പറന്പിലെ കൃഷിപ്പണികൾ കൂടാതെ വീടുകളിലെ കൃഷി പ്രോത്സാഹിപ്പിക്കുന്നതിലും യുവതികളെ പ്രാപ്തരാക്കും. ഗ്രോബാഗാണു വീടുകളിൽ നൽകുന്നത്. കുന്നുകര പഞ്ചായത്തിൽ ഇത്തരത്തിലുള്ള സംഘത്തിന്‍റെ നേതൃത്വത്തിൽ 30 ഏക്കറിൽ കൃഷി ആരംഭിച്ചിട്ടുണ്ട്. നിലവിൽ തൊഴിലുറപ്പ് കാർഡ് ഉള്ളവരെയാണു പദ്ധതിയിൽ ഉൾപ്പെടുത്തിയിരിക്കുന്നത്.
