തിരുവനന്തപുരം: ലോ അക്കാഡമിയിലെ വിദ്യാര്‍ഥിയെ പ്രിന്‍സിപ്പല്‍ ലക്ഷ്മി നായര്‍ ഭീഷണിപ്പെടുത്തുന്നതിന്റെ ശബ്ദരേഖ മാധ്യമങ്ങള്‍ പുറത്തുവിട്ടു. ഹാജര്‍ കുറഞ്ഞുപോയ വിദ്യാര്‍ഥി മെഡിക്കല്‍ സര്‍ട്ടിഫിക്കറ്റുമായി സമീപിച്ചപ്പോഴായിരുന്നു ഭീഷണിപ്പെടുത്തിയത്.
ആരോഗ്യമില്ലെങ്കില്‍ പിന്നെ നീ എന്തിന് എല്‍എല്‍ബി പഠിക്കാന്‍ വന്നുവെന്നും ജീവിതകാലം മുഴുവന്‍ നീ കുരിശാണെന്നും അടുത്തവര്‍ഷം നീയ ഇയര്‍ ഔട്ടാകുമെന്നും ലക്ഷ്മി നായര്‍ വിദ്യാര്‍ഥിയോട് പറയുന്നതാണ് ശബ്ദരേഖയില്‍ ഉള്ളത്. ഇത്തരത്തില്‍ നിരവധി കുട്ടികളോട് ലക്ഷ്മി നായര്‍ മോശമായി സംസാരിക്കുന്ന തെളിവുകളുണ്ടെന്ന് ലോ അക്കാഡമിയില്‍ പ്രതിഷേധിക്കുന്നവര്‍ നേരത്തെ വ്യക്തമാക്കിയിരുന്നു. പെണ്‍കുട്ടികളോട് വളരെ മോശമായാണ് ലക്ഷ്മി നായര്‍ സംസാരിക്കുന്നതെന്നും കുട്ടികള്‍ നേരത്തെ ആരോപണം ഉന്നയിച്ചിരുന്നു.
