ആലപ്പുഴ: ആലപ്പുഴ മൊബിലിറ്റി ഹബ് ടെൻഡർ നടപടികളിലേക്ക് കടക്കുകയാണെന്നും 700 കോടി അടങ്കൽ തുകയുള്ള ഈ പദ്ധതി പൂർത്തിയാകുന്നതോടെ ആലപ്പുഴയുടെ മുഖച്ഛായ തന്നെ മാറുമെന്നും മന്ത്രി ജി. സുധാകരൻ. ആലപ്പുഴ ബോട്ടുജെട്ടിക്ക് സമീപം ജലഗതാഗതവകുപ്പ് പുതുതായി നിർമിച്ച് നീറ്റിലിറക്കിയ അഞ്ച് അത്യാധുനിക യാത്രാബോട്ടുകളുടെയും(ലക്ഷ്യ) കൈനകരി സർക്കുലർ സർവീസിന്‍റെയും ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി.
ആലപ്പുഴയിലെ കെഎസ്ആർടിസി, വാട്ടർ ട്രാൻസ്പോർട് എന്നിവയെ യോജിപ്പിച്ച് അത്യാധുനിക സൗകര്യങ്ങൾ മൊബിലിറ്റി ഹബിൽ ഒരുക്കും. ഇതോടൊപ്പം 276 കോടി രൂപ ചെലവഴിച്ച് നഗര റോഡ് വികസന പദ്ധതി നടപ്പാക്കി വരുന്നതായും മന്ത്രി പറഞ്ഞു. ആലപ്പുഴ ബൈപ്പാസ് മേയ് മാസത്തിൽ തുറക്കാൻ കഴിയും.
കരാറുകാരന്‍റെ വീഴ്ചയും റയിൽവേയുടെ ഭാഗത്തുനിന്നുള്ള തടസങ്ങളുമാണ് ബൈപ്പാസ് ഉദ്ഘാടനം വൈകാൻ കാരണമായത്. റോഡിന് ടോൾ എന്നത് സംസ്ഥാന സർക്കാരിന്‍റെ നയമല്ല. ഈ സർക്കാർ വന്നതിനുശേഷം 26 ടോൾ ബൂത്തുകളിൽ 20 എണ്ണം നിർത്തലാക്കിയെന്നും മന്ത്രി പറഞ്ഞു. സംസ്ഥാന ജലഗതാഗത വകുപ്പ് ആധുനികീകരണത്തിന്‍റെ പാതയിലാണെന്ന് മന്ത്രി എ.കെ. ശശീന്ദ്രൻ അധ്യക്ഷ പ്രസംഗത്തിൽ പറഞ്ഞു.
മൂന്നുമാസത്തിനകം വാട്ടർ ടാക്സികൾ ആരംഭിക്കും. ഒന്പത് കാറ്റമറൈൻ ബോട്ടുകൾ നിർമാണ ഘട്ടത്തിലാണ്. രണ്ടുനിലയുള്ള സോളാർ ക്രൂയിസ് ബോട്ട് നിർമാണം ഏപ്രിലിൽ പൂർത്തിയാക്കും. കൂടാതെ എറണാകുളം -ചവറ ജല ചരക്കുഗതാഗതത്തിന് പഠനം നടത്തിവരുന്നു. കൈനകരിക്കാർക്കുള്ള നവവത്സര സമ്മാനമാണ് സർക്കുലർ ബോട്ട് സർവീസ് എന്നും മന്ത്രി പറഞ്ഞു. കുപ്പപ്പുറം, പാണ്ടിച്ചേരി, കൈനകരി , കുട്ടമംഗലം, വേണാട്ടുകാട്, ചേന്നങ്കരി എന്നീ പ്രദേശങ്ങളിലെ ആളുകൾക്ക് പുതിയ സർവീസ് ഏറെ പ്രയോജനപ്പെടും.
ആലപ്പുഴയിൽ നിന്നും കൈനകരി റോഡ് മുക്കിൽ എത്തിച്ചേരുന്ന ബസുകളുടെ സമയക്രമം അനുസരിച്ചാണ് ബോട്ടിന്റെ ഷെഡ്യൂൾ സമയം ക്രമീകരിച്ചിട്ടുള്ളത്. അഞ്ച് ആധുനിക സൗകര്യങ്ങളുള്ള സ്റ്റീൽ ബോട്ടുകൾക്ക് ഓരോന്നിനും ഒരു കോടി രൂപ ചെലവ് വന്നു. ഒരേസമയം 75 പേർക്ക് സഞ്ചരിക്കാൻ സാധിക്കുന്ന ലക്ഷ്യ ബോട്ടുകളിൽ യാത്ര സുഖകരമാക്കുന്നതിന് ആവശ്യമായ ആധുനിക സീറ്റുകൾ, ശബ്ദം കുറഞ്ഞതും വൈബ്രേഷൻ കുറഞ്ഞതുമായ എൻജിൻ എന്നിവയാണ് ഉപയോഗിച്ചിരിക്കുന്നത്.
അത്യാധുനിക സുരക്ഷാ ഉപകരണങ്ങൾ ഉൾപ്പെടുത്തി നിർമിച്ചിരിക്കുന്ന ബോട്ടുകൾ ലോകോത്തര നിലവാരത്തിൽ ഐആർഎസ് ക്ലാസിലാണ് നിർമിച്ചിട്ടുള്ളത.് അനുകൂല സാഹചര്യത്തിൽ 16 കിലോമീറ്റർ വേഗത്തിൽ ഈ ബോട്ടുകൾക്ക് സഞ്ചരിക്കാൻ കഴിയും. ബയോടോയ്ലറ്റ് സൗകര്യവും ബോട്ടിലുണ്ട്. സിൽക്കാണ് ബോട്ട് നിർമിച്ചത്. കളക്ടർ എസ്. സുഹാസ്, ജലഗതാഗത വകുപ്പ് ഡയറക്ടർ ഷാജി വി. നായർ, നഗരസഭാംഗം ഡി. ലക്ഷ്മണൻ, സിൽക്ക് മാനേജിംഗ് ഡയറക്ടർ ചന്ദ്രബോസ്, ട്രാഫിക് സൂപ്രണ്ട് സത്യൻ എന്നിവർ പ്രസംഗിച്ചു.
