റിലീസ് ചെയ്യാത്ത തന്‍റെ സിനിമയെക്കുറിച്ച് ഫേസ്ബുക്കിൽ കൂടി മോശം അഭിപ്രായം പറഞ്ഞയാളെ കൈയോടെ പിടികൂടി സംവിധായകൻ ലാൽ ജോസ്. കുഞ്ചാക്കോ ബോബൻ നായകനായി എത്തുന്ന തട്ടിൻപുറത്ത് അച്യുതൻ എന്ന സിനിമയെ ആണ് “ഹിഷാം’ എന്നയാൾ ഫേസ്ബുക്കിൽ ഡീഗ്രേഡ് ചെയ്യാൻ ശ്രമിച്ചത്.
22നാണ് സിനിമ റിലീസ് ചെയ്യുന്നത്. ലാൽ ജോസിന്റെ പേജിൽ ഈ സിനിമയെക്കുറിച്ചുള്ള ഒരു പോസ്റ്റിന്റെ കമന്‍റിലാണ് “പൊട്ടപ്പടം കാശ് പോയി’ എന്ന് ഒരാൾ കമന്‍റ് നൽകിയത്. എന്നാൽ റിലീസ് പോലും ചെയ്യാത്ത തന്‍റെ സിനിമയെക്കുറിച്ചുള്ള അഭിപ്രായം ശ്രദ്ധയിൽപ്പെട്ട സംവിധായകൻ സ്ക്രീൻ ഷോട്ട് എടുത്ത് തന്‍റെ പേജിൽ പങ്കുവയ്ക്കുകയായിരുന്നു.
സ്ക്രീൻഷോട്ട് പങ്കുവച്ച് ലാൽ ജോസ് കുറിച്ചു. “അച്യുതൻ റിലീസായി എന്നു കരുതി പാവം. ഹിഷാമെ നാളെ പടം കാണണെ’. ഹിഷാമിന് മരണമാസ് മറുപടി നൽകിയ സംവിധായകന്‍റെ പോസ്റ്റ് ഇതിനോടകം തന്നെ വൈറലായി മാറിയിരിക്കുകയാണ്.
പുറത്തു വിട്ട ചിത്രത്തിലെ ഗാനങ്ങൾക്കും ട്രെയിലറിനുമെല്ലാം മികച്ച പ്രതികരണമാണ് ലഭിക്കുന്ന്. പുതുമുഖം ശ്രവണ ബാബുവാണ് തട്ടിൻപുറത്ത് അച്യുതനിലെ നായിക.
